- PC Thang Zikpuia
Mizo Language Committee (MLC) chuan an lehkhabu ‘Mizo tawng Ziah Dan’ 2nd edition phêk 23-na leh 3rd edition phêk 30-na leh 4th edition phêk 32-ah te hian ‘atân’ tihna ‘ah’ hi ‘atân’ tih kan ziah hran ang hian ziah hran tur a ni tiin an dah a. Hetiang hian entirna sentence an târ lang a:
1) Chu puanthan chu kawr ah ka duh mang e.
2) He mau hi pal ah a tha hle mai.
3) Saw nula saw nupui ah nei ta che.
Hetianga ‘ah’ hi ‘atân’ tih tlukpui a niha ziah hran a nih hian dik ve àwm takin a lang deuh roh a ni maithei a; amaherawhchu, grammar atanga Mizo tawng kàl phung han bih chìan erawh chuan ‘ah’ hi suffix a ni a, ‘atân’ hi postposition a ni a, nih phung inang lo daih an nih avangin ziah dan inanga ‘nupui atân, nupui ah’ tiin emaw, ‘nupuiah, nupuiatân’ ti emawa ziah dan inanga ziah chi hi niin a lang lo a ni.
Suffix ‘ah’ hi mood inthlâkah ‘a’-in kan thlâk thin a. Entir nân–MLC-in entirna sentence an rawn dah ang deuh hian, “Nupuiah nei se ka ti; nupuia a neih chuan a ti fuh ngawt ang,” tiin ‘nupuiah’ tiha suffix ‘ah’ hi mood dangah ‘a’-in kan thlâk a, ‘nupuia’ tiin kan sawi thin a. Hengah hian MLC-in ziah dan tur an tih anga kan ziah dâwn chuan, “Nupui ah nei se ka ti; nupui a a neih chuan a ti fuh ngawt ang,” tiin ‘nupui ah’ tiin leh ‘nupui a’ tia kan ziah hi a ngâi dâwn tihna a ni.
Suffix ‘ah’ hi grammar-a a nih phung leh a hna thawh hi kan hriat fiah a ngâi a. A behna thu mal azirin a behna kha adverb of place-ah te, adverb of time-ah te, specifying adverb (referencial adverb)…adt.-ah te a chantir thin a. Entir nân:
1) Chhùarah lehkhabu a awm.
2) Vawiinah thing ka phur.
3) Hei hi kawrah ka thui dâwn.
Entirna sentence pakhatnaah hian suffix ‘ah’ hian a behna noun thu mal hi ‘adverb of place’-ah a siam a, entirna pahnihnaah hian suffix ‘ah’ hian a behna noun thu mal hi ‘adverb of time’-ah a siam leh a. Pathumnaah hian suffix ‘ah’ hian a behna noun thu mal hi ‘specifying adverb’-ah a siam ve leh bawk a. Hengah hian ‘chhuarah, vawiinah, kawrah’ tia kan sawi hi mood inthlâkah chuan, “Chhuara lehkhabu saw…” tiin leh, “Vawiina ka thing phurh kha…” ti tein leh, “Hei hi kawra thui ka tum,” ti tein kan sawi thin a. Hengah hian suffix ‘ah’ hi kan ziah hran mai chuan mood inthlâka ‘a’ tia kan sawinaah pawh hian ‘a’ hi kan ziah hran ve zel a ngâi dâwn tihna a ni ta a; hei hi MLC-a Mizo tawng ziah dan tur duangtute hian an hmu kim ve leh tawh si lo niin a lang.
Chuvangin, suffix ‘ah’ hi a behna thu mal azirin postposition ‘atân’ tih nen hian an hna thawh a inanna lâi chu lo awm ve mah sela, ‘atân’ tih kan ziah hran anga ziah hran ve chi niin a lang lo a. Entir nân–‘nupuiah ka duh’ tia kan sawi hian, suffix ‘ah’ hian a behna noun thu mal hi ‘nupui atân’ tih tlukpuiah a rawn chantir tihna mai a ni zawk thin a ni.
Grammar bû kan lo neih tawh thinah te grammar bu ziaktute leh zir lâi bu ziaktute’n suffix ‘ah’ leh ‘a’ hi (‘in’ nen) postposition tiin an lo sawi mai thin a; nimahsela, posposition titute ber pawh chuan postposition-ah an hmang thei ngăi lo a, suffix-ah hlir an hmang thin lawi a. Mi pakhat chuan ‘postpositional suffix’ ti tein a’n rawn phuah ngial bawk a (Hemi chungchâng hi chu chanchinbu lamah te pawh a sawi fiahna ka ziah tawh kha)! Chûng zirtirna dik lo chu MLC hian dik anga lantir tumin, ‘atân’ tih tlukpui atân bik hian ‘ah’ hi ziah hran an rawn rawt ta mai ni te pawhin a lang ta a ni.
— Ipte ah ka duh.
Ipte i ak duh nge, ipte atân i duh? tum khata chipchiar kimchang taka sawi dâwn chuan a thui hmâ thin si a; a tùl taka leh kan la chhunzawm zel mai dâwn nia. Kan thu ziah thupui hming hi a tâwp khàr nan MLC duh dan angin—‘atân’ tlukpui ah ‘ah’ hi ziah hran chi a ni em?