Cachar leh Mizoram thutchilhtu BSF Frontier Inspector General Binay Kumar Jha-a’n nimin (Pathianni) khan Tlabung tlawhin, India leh Bangladesh inrinaa venhim hna tihchakna tura Khawthlangtuipuia lei dawh dan tur a enfiah.
Nimina lehlanga Tlabung tlawhtu – Cachar leh Mizoram Frontier BSF IG Binay Kumar Jha chuan Khawthlangtuipuiah lei dawhkai a nih loh avangin sipai ten kawng hrang hrangin harsatna an tawk thin niin a sawi a. Lei dawh tur chuan sipaite harsatna zualpui a chhâwk dawn nia sawiin, mipuite pawhin an chhawr tangkai hle dawna a hriat thu a sawi.
Central PWD hotu te chuan lei dawhkai tur chu metre 204-a sei, metre 5.5-a zau a nih tur thu zawhna chhangin an sawi a. He lei dawhna atana hian Rs. nuai 5040 ruahman a nih thu sawiin, “Thil a kaltluan chuan kumin chhunga hna tan hman beisei a ni,” an ti.
Tlabung leh a chhehvela ramri-ah venhim hna chak zawka thawh a nih theih nan Khawthlangtuipuia lei dawhkai a tul thu hi BSF hotu ten nikum kumtira Tlabung tlawhtu Rajya Sabha MP K Vanlalvena hnenah an lo thlen tawh a; K Vanlalvena chuan hotu lian zawkte hnenah thlen velehin, vawi tam tak a tul anga a bawhzui hnuah, tunhnai khan Ministry of Home Affairs chuan lei dawhkaina atan hian sum a ruahman fel ta a ni.
Nimina Tlabung tlawhtu Binay Kumar Jha hi BSF 163 battalion Commanding Officer mawhphurhna latu Amar singh Narwal, Central PWD hotute leh, National Projects Construction Corporation Limited (NPCC) hotu ten dawngsawngin thil pawimawh an sawipui a; lei dawhkai hna tluang taka tan thuai a nih theihna tura hmalak dan tur an sawiho bakah, hmalak tawh chin an thlirho bawk.