Aizawl: Central YMA hnuaia ruihhlo dotu Central Anti Drugs Squad (CADS) batch hmasa te hun a tawp hnaih tak avangin batch thara puipa turte ruat an ni a. CADS batch khatna hian Heroin hawng 400 chuang leh ruihhlo dang thahnem tak an man tawh a ni.
September ni 9, 2022 atanga CYMA hnuaia ruihhlo do hna thawk tan CADS 1st batch hian Heroin hawng 390 leh tictac bur 351 bakah ruihhlo dang – methamphetamine mum 10133, Alprozolam tablet 1205, Ganja kg 1 aia tam, khuh damdawi bur 3010 an man tawh.
Ruihhlo an mansak zinga mi 71 te chu Excise & Narcotics kutah hlanin, Police kutah mi 2 an hlan a, heng mite hi thubuai siamsak niin, ruihhlo ngai enkawlna hmunah mi 6 an dah tawh bawk.
Ruihhlo ngawlvei, an ruihhlo kawl lai nena an man te chu Synod-in counsellor a pek ten counselling an pe thin a, Inrinni thleng khan mi 226 te chu couselling pek an ni tawh.
CADS batch hmasaber term hi a tawp dawn tak avangin kar kalta Zirtawpni zana Central YMA executive committee (CEC) thutkhawm chuan batch hnihnaa puipa tur a ruat thar a, Convener-ah Fabian Lalfakawma, Treasurer CYMA; Asst. Convener-ah RL Zomawia, CEC; Secretary-ah Chawngthankima, CEC; Asst. Secretary-ah L. Ramdinliana Renthlei, CEC te ruat an ni. Aizawl khawpui chhunga branch te atangin member tur mi 48 ruat an ni bawk. CADS batch hnihna te hian November leh December, 2022 chhung an thawk ang.
CEC thukhawm chuan November ni 8, 2022-ah YMA leh PHE department te thawhhona kal zelah Aizawl khawpui luhna kawngpui dung thenfai hnatlang neih an rel a, November ni 10,2022-ah PWD leh YMA thawhhona chungchang sawihona hun Bawngkawn South YMA Hall-ah hman an rel bawk.