Quippo Oil & Gas Infrastructure Limited-a thawk mi pahnih, helho ni ngeia rinten an ruk bo chu ni 17 zet hnuah pawh Arunachal Pradesh Police chuan an hnuhma chhui zui tur an la hre thei lo.
State police-te hian ngawrh takin zawn hna thawk mah se an awmna chin hriat theihna tur âwm ang reng reng an la nei lo.
An hnu chhui tur hre lo mah se police leh venhim hna thawktu hrang hrangte chuan theihtawp an chhuah zui zel tho va. “He thilah hian min hruai thei tur engmah hriat kan la nei lo,” tiin Changlang SP Mihin Gambo chuan a sawi.
Quippo Oil & Gas Infrastructure Limited-a thawk pahnih – Drilling superintendent PK Gogoi (51), Assam-a Sivasagar khaw mi leh Radio Operator Ram Kumar (35), Bihar hi December 21 khan an bo va, ruk bo ni ngeia hriat an ni.
An pahnih hian Quippo Oil & Gas Infrastructure Limited-in hna an thawh mekna hmun, Innao, Changlang district, Arunachal Pradesh-a thawk dun an ni.
Thawktu pahnih ruk bo an nih hnuah hian Innao-a lei an verhna hmuna thawktu dang zawng zawng chu hlauh vangin an insuan chhuak vek a ni.
“An thawhpuite ruk bo an nih avang hian an hlau hle a, a hmun hi chhuahsanin an haw a, thenkhat chu Duliajan-a an company pisaah an awm,” tiin Changlang district Deputy Commissioner Dr Devansh Yadav chuan a sawi.