Mihring phur Tanzanian thlawhna chu Lake Victoria kama Bukoba khuaa a tum tur dilah tlain mi pathum an thi nia hriat a ni.
Precision Air thlawhnaah hian mi 43 an chuang a, mi 26 chu chhanchhuah niin damdawi inah dah an ni ti thuneitu pakhat chuan a sawi.
A khalhtu pahnih chu an dam a; mahse, cockpit-ah an la tang a, tual chhung thuneitute nen an inbepawp.
Chhanchhuah hna thawktu leh sangha mantute thlawhna chhung atanga lak chhuah tur an la awm em tih an dap zui mek zel.
Emergency worker-te chuan ATR-42 thlawhna hi Africa-a dil lian ber, Lake Victoria lamah hruiin an hnuk hnai a. Bukoba thlawhna tumhmun tawp lam hi vaukam bul lawk hi a ni.
A tlak hnuah thlawhna hi tuiah a pil deuh vek a, a taksa chung lam leh mei buang leh hring chauh a lang thei.
A tlakna laia thuneitu sang ber, Albert Chalamila chuan ruang pathum an hmuh tawh thu leh chetsualna thlen chhan hi khaw awm danin a zir loh vang niin a sawi.
President Samia Suluhu Hassan chuan chhiat tawkte a tawrhpui thu leh chhanchhuah hna thawh zui zel tur a nih thu a sawi.
Thlawhna hi Tanzania-a khawpui lian ber, Das es Salaam atanga Mwanza tlawh hmasaa Bukoba pan zui a ni.
Precision Air hi Tanzania-a mi mal airline lian ber niin Kenya Airways pawhin neitu nihna a nei a. Kum 1993 khan din niin tual chhung bakah an thenawm hnai ramte an tlawh kual thin.