Aizawl : Kolasib Officers Club buatsaih, Inter-office sports chu Zirtawpni khan Kolasib Stadium-ah Kolasib Bawrhsap John LT Sanga’n a khar a. He inelnaah hian DR- DO & Allied, White team te chu inelna hrang hrang 18-ah medal 11 lain champion an ni.
Kolasib Bawrhsap chuan hnathawhna sawt zawka kalpui tur chuan rilru leh taksa hrisel neih a tul thu leh thawhhona boruak tha siam thiam a pawimawh thu a sawi a. Kolasib district chunga sorkar office hrang hrang inpawhtlanna tur leh thawhhona tha siamna tura Kolasib officers club-in Inter-office sport an buatsaihna chuan rah tha tak a chhuah ngei a beisei thu a sawi.
Mahni hna ngaipawimawha, thawhhona boruak tha siamtu nih tum theuh tur leh mahni office theuha mawhphurhna hrang hrangte ngaipawimawhtu sorkar hnathawk nih tum theuh turin Kolasib Bawrhsap chuan Inter-office sports-a tel te chu a chah bawk.
Inter-office sports hi tun thla ni 1 khan tan niin, Kolasib dist-a sorkar pisa leh bank 78 a thawktute an tel a. Team 8-ah inthenin inelna hrang 18 hmangin an inel a ni.