- Lallunghnema, Charity Lodge
Consumer huang ka buaina kawngah hian hlingin min chhun thin a. Neih nei si lo hian inti thei takin consumer te zinga harsatna tawkte ka lo pui ve khanglang thin a. Kei mirethei hi!! Mahse tun thleng hian min duhsaktute zarah chaw ka la nghei lo, mahse Charity Lodge chung erawh fur a lo nih hian a far fo. Ka zak lem lo.
Hei hi ka in a ni a, mi In a ni lo. Kan chhungkuaa Pathian kan biakna hmun a ni a.Corruption tel hauh lova kan.chhungkua a kan din a ni. Consumer-te tana kan luan chhuahna In a ni a, ka ngai hlu hle. a ni.
Tun tumah hian Godrej Project pawisa refund tura tih thu National Commission thuchhuak hi kan zirlai atan ka rawn chhawp chhuak a ni. October ni 29 kum 2022 a ni a. Consumer news internet a ka hmuhah chuan hetiang hian tarlan a ni.
Sap tawng bawkin bul ka han tan leh teh ang. ‘For failure to provide 24 meters road connecting the Project, the road was portrayed the advertisement and buyer agreement NCDRC paid adding that road connecting was an important feature which propelled buyer to take a decision to buy into the projects. It also held the builder responsible for deficiency of service for not providing regular water supply, electricity supply and sewerage treatment plant. ‘
Tichuan, he hmun(project) leitu(buyer) hian a lei zawng zawng hi 2324 square ft. zet a ni a; kum 2015 khan tih fel a ni vek a. Pawisa pawh nuai sawmnga chuang zet a pe a ni. Mahse, agreement a tarlan ang hian engmah tih mumal a awm lo va, home buyer hi a lung ni thei ngang lova, complaint a theh lut ta a ni. National Consumer Disputes Redressal Commission chuan he thu(complaint) hi a ngaihtuah a. Deficiency of service a awm ngai tih a hria a.Tichuan, NDRC chuan Godrej Project hremna thu a tichhuak ta a. Homebuyer -in a tira pawisa Rs. 46.94 lakhs bakah Rs. 4.42 lakhs a chawi belhtir ta a ni. Consumer Commission thubuai remna ka han tihchhuah hi a kip a kawi ka tarlang ta lo a ni.
Ka duh ber chu Mizoramah pawh hian Homebuyer- te hi consumer an ni a, hnathawktu (mistiri leh helper) te hi service pe tute an ni a. Service petu in sa tute hian mawhphurhna an nei lian em em a ni. Chutiangin Project leitute hi consumer dik tak an ni a, right an nei tih hi a chiang em em a. Mi tupawhin kan right hi kan hriat chian a ngai a ni. Mipui hian kan right i zir ve ang u. Hriat i tum ve tawh ang u. Hmanni deuh lawk pawh khan complaint chi hrang hrang karah in sak tirtu officer pakhat chuan a in sa tute laka a lungawi loh thu min hrilh. In sa tute chu ka va phone a. Eng chanchin nge an neih zel erawh ka hre lo. Warranty card an lo in pe nghe nghe a. In sak tirtu hian a tih tur dik tak a ti a. A right champion pui hi chu a mawhphurhna a ni .Huaisen tak a complaint hi a fakawm a. Huaisen chhunzawm zel se, midang tana entawn tur pho chhuak ngei se ka duh hle a ni. Mi dang pawh lo inzir ve teh u.
Thudang consumer issue leh interest ni si kan sawi lawk teh ang. LP Gas hi chhungkawtin deuh thawin kan hmang ta a. Gas bur buktir erawh an awm mang lo. Gas bur phai complaint a awm fo. Buktir ngam lo, buktir peih lo hi a Kristian lo hle a ni. Chuvangin Gas latu zawng zawngte Gas buktir zel turin ka han ngen duh a ni. Hetih lai hian Gas consumer huaisen ka hmu fo tho. Kan unaupa F. Lalnienga mi lar leh boxing lalpa hi consumer te chhantu tha tak a ni zel mai. Gas a buktir thin. Midang hnenah pawh ‘buktir rawh u’ a ti fo. A entawntlak hle a ni.
Kan nau Muana, College zirtirtu pawh hi consumer huaisen tak a ni. A la huaisen zel ka beisei. Consumer-te dikna, zalenna leh chanvo hi sawi zel mai ila, harh chhuah hun kan la nei ngei dawn. I beidawng lo ang u. Chhuak lehah Hospital hrem thu kan sawi ang. See you next Monday Zozam Times.
Nb: He thu ka buatsaih lai hian bungraw home delivery chungchangah Complaint a lo lut a.Hma lak a ni ang.Result chu he Column-ah hian kan ziak ang.