Machine gun leh rocket-propelled grenade nena inthuam mi sual rualin Nigeria chhimchhak lama lung in an beihnaa mi tang 1,800 chuang an chhuahtirte chu thuneituten man leh tumin an um zui mek.
Imo state-a Owerri khua hi Inrinnini zing dar 2:00 vela beih niin a mi cheng, Uche Okafor chuan a sawi a. Police leh sipai hmun pawh an bei tih thuneituten an sawi.
“Tang tlan chhuakte man leh tumin theihtawp chhuah a ni,” tiin tan in thupuangtu, Francis Enobore chuan a sawi a, mi 35 chu an tlan chhuak ve lo niin a sawi bawk.
Tun tuma beihna thleng hi chawlhkar hnih liam ta leka Nigeria chhim chhak lama police station, sipai checkpoint leh tan in lirthei beia venhim hna thawktu thahnem tak thah an nih hnua thleng a ni.
Tun tuma beihnaah hian a titua inchhal an awm lo va; mahse, Nigeria inspector general of police chuan Indigenous People of Biafra (IPOB) leh an hnuaia mi, Eastern Security Network (ESN) an nih thu a sawi.
“Kan chhui chinah chuan Indigenous People of Biafra tih a ni,” tiin police thupuangtu, Frank Mba chuan a sawi.