Tripura BJP in-charge Vinod Kumar Sonkar chu nimin khan Agartala-a ni thum châm turin a thleng.
State BJP hruaitu, Tinku Roy leh Papiya Datta chuan Sonkar hi Agartala Airport-ah an lo hmuak.
A châm chhungin Sonkar hian state BJP hruaitute thutkhawmpuiin Udaipur-ah hruaitute hian an kalpui bawk ang.
Udaipur-ahhian Gomati district-a an party hruaitute a kawm ang a, Shantirbazar pawh tlawhin hruaitu dangte nen an inkawm ang.
Agartala-ah Zirtawpniah let lehin Delhi-ah a thlawk haw zui dawn a ni.
Hetih lai hian Chief Minister Biplab Kumar Deb chu Thawhlehni khan central lama an hruaituten an koh avangin New Delhi panin a chhuak ve thung.
Tripura-ah hian rorel lai, BJP chhungkuaah buaina awm mekin an MLA thenkhatin Deb-a chu an duh lo va. Tunah pawh hian heng MLA zinga mi pahnih, Ramprasad Pal leh Sudip Roy Barman chu Delhi-ah châm mekin an hruaitute an kawm a, BJP national president JP Nadda pawh an hmu tawh.
MLA lungawi lote hian an state-a hruaitu chu siksawi an duh.
Chief minister hian January 10 thlengin a hun hman tur hrang hrangte a thulh nia sawi a ni a. Deb-a hi district pathum tlawh tur leh Ningania Agartala-a Police Week hmanpui tura tih lawk a ni.
Delhi-a a kal bakah hian Gandhinagar, Gujarat-a Rashtriya Swayamsevak Sangh (RSS) ‘Rashtriya Samanaya Baithak’, a national coordination meeting-ah a tel dawn bawk nia sawi a ni.
Gandhinagar-ah hian an hruaitu lawkte nen an state-a an buaina chu an sawiho bawk ang.
Sonkar hian December khan Tripura hi tlawhin MLA lungawi lote hian Deb-a paih thla tura an duh thu an lo thlen tawh.