United States-a midterm election an tihah thawm a lian hle a, state pawimawh leh inbeih tawkna hmun, Pennsylvania-ah chuan ni khatah a rualin president pathum ngawt mai campaign-in mipui hmaah an inlan a. Donald Trump-a’n Republican candidate tana a beih laiin Barack Obama leh Joe Biden chu hmun khatah Democrat tan hma an la ve bawk.
Politician langsar pathumte hian an vaiin American-te hi thu pakhata fuih tlanna an nei a, chu chu vote thlak tura tihna a ni.
Biden-a leh Obama hian mipui rorelna kalphung a nih angin an vote an thlak dawn thu an sawi a, hetih lai hian Trump-a chuan an ram himna chu derthawng takin a awm mek tih a sawi thung.
Thawhlehnia US midterm election hi an ram rorelna in, Congress thununtu tur zawk party tihchianna tur a ni.
Rorelna in pakhat zawk, House of Representatives-a thu tur member 435 an thlang dawn a, Senate member tur 35 an thlang dawn bawk.
Pennsylvania-ah hian Democratic Senate candidate John Fetterman, 53, leh Republican Mehmet Oz, 62, te inthlauhna hi a chhe hle a. President hlui pahnih leh President Biden-a ten kartawpa a rual thawta an tlawh hian he state pawimawhzia a tilang.
Kum 2016-a Pennsylvania-a hnehna a chan kha Trump-a’n White House a luah theih phah chhan lian tak a ni.
An kal dan leh an thiangzauna chuan kum 2020-ah Democrat-te chu thuneihna a chantir lehnghal a; mahse, Biden-a hian a chawr chhuahna state-ah hian Trump-a aiin 2% pawh tling mang lo chauhvin vote a hmu tam.
Inrinnia Philadelphia-a thu a sawinaah Biden-a chuan Fetterman-a leh governor atana Democratic candidate Josh Shapiro te tan chuan an state chu ‘an in a nih a tawk’ niin a sawi.
Democratic party chu House of Representatives leh Senate-ah thuneihna an chantir leh a nih chuan nau tihtlak khap leh niin healthcare tam tak an tibo leh dawn niin mipui a sawi thaih.
Congress-a rorelna in hnih hi tunah chuan Democrat-ten an thunun mek a; mahse, tuna ngaihdan laknaa a lan dan chuan House hi an chân hmel a, Senate-a an dinhmun pawh a derthawng hle.
“Philadelphia hi America thinlung sawifiahtu a ni a, vawiin hian thil pawimawh tak tak kan hmachhawn a ni,” tiin Biden-a chuan a sawi a. Democrat-te vote chu hmeichhiate hriselna, silai thunun leh healthcare atana vote thlak a nih thu a sawi bawk.
Inkhawm neihna pawnah hian president pahnih – Biden leh Democratic atanga a thlak tak, Obama te dawhsan pakhata an awm hmuh tum tam tak an intlar.
Pennsylvanian pakhat, Steve Phillips chuan an vote tur chu tu zawk pawh ni se, mipuite chuan vote an thlak that a rin thu a sawi.
Mipui zinga tam tak chuan Obama an hmuh châk thu an sawi a, Biden-a chauh chu kal ni sela an tel kher loh tur thu an sawi hlawm.
Midterm election hi president tanglai bukna ang a ni deuh ber a, Biden-a duhna hi nasa taka tlahniamin mipui 40% vel chauh an ni tawh a, Republican-te lahin American-ten thil man sang, silai chelek tam leh ram dang atanga pem an tam lutuk chu anmahni dinhmun tiderthawngtu tiin an sawi ve reng bawk.
Obama leh Biden-a hun hmanna atanga km 402-a hla, Philadelphia khawthlang lama Latrobe khuaah Trump-a pawhin hun hmangin Democratic-in Washington an thunun zel chuan sualna a puangin pem lut an tam zel dawn niin a sawi.
Trump-a hmuh tum hian hma takah mipui an inhawr khawm bawk.
“In chhungkuain himna in duh a nih chuan Democrat tute pawh hi an pisa luah lai atanga in paih chhuah a ngai a ni,” a ti.
“Duhthlan tur pakhat chauh a awm – America hnungtawlh leh tlahniam zel i duh a nih chuan Democrat-te i vote a ngai a. Kan ram tluchhe mek hi tihtawp i duh a nih thung erawh chuan puanzar sen nen Republican-te i vote a ngai a ni mai,” a ti.
Republican president hlui hian kum 2024-a president inthlan turah a chuh leh mai thei tih a sawi bawk a, 2020-a a tlak tuma an inthlan dan phunga felhlel awm nia a sawi pawh a sawi chhuak leh a. “Inthlan kha tihchingpen leh ruk bo a ni a, a zahthlak hle a ni,” a ti.
Trump-a thu sawina hmuna tel pakhat chuan president hlui lama a tan thu a sawi a, a chhan chu mipuite chu nekchepna awm lova awm theihna tura a beih avang leh engnge an mamawh tih a hrilh vang a nih thu a sawi.
Midterm inthlanah hian inthlan tihchingpen hlauhna leh intihderna a thlen hlau an tam hle a, mi tam tak chuan November 8-a an inthlan tur hi an inthlan dan phung rintlak leh tlak loh fiahna tur a nih thu an sawi.