Hachhek bial Kuhva chingtute (HBKC)-in nimin zing khawvar hma khan Luimawi bulah dan lova tawlhruk, Myanmar Kuhva ro truck trip 2 an man leh a, truck pahnih te hian bag 120 ve ve an phur a, dan lova tawlhruk Kuhva ro leh a phurtu driver HBKC-in an man te hi Police kutah an hlan.
Thudawnnain a sawi danin, Kuhva ro tawlhruk phurtu truck te hi car (Scorpio) dum pakhatin a zui a, scorpio khaltu hian a motor leh a chabi tlanchhiatsan a, Kuhva phur tho truck dang pahnih an tlan tlang hman bawk.
Tarlan tawh thin angin Myanmar lam atanga Kuhva ro tawlhruk avangin Hachhek biala Kuhva chingtu ten an Kuhva thar te Assam lama hralh kawngah harsatna an tawk nasa a. Vawi tam tak sorkar-ah an harsatnate an thlen tawh hnu pawha Kuhva tawlhruk a la awm reng chu an hrethiam lo hle tih an sawi.
Nimina Luimawi bula Kuhva tawlhruk man te phurtu truck driver ten an insawi danin, Kuhva tawlhruk phurtu truck pakhat zawk khalhtu chu Lalchhandama, Champhai, Dinthar niin, a truck neitu Laltlanzuala, Champhai Venglai a ni a. Truck dang pakhat zawk khalhtu Lalbiakdika niin, truck neitu Ruatdika, Bawngbawk, Aizawl a ni thung. Kuhva te hi Vairengte atanga an phurh chhuah niin driver te chuan an sawi bawk.