AZL: MNF Adviser, Minister of State ni bawk Robert Romawia Royte-in Chief Minister-in Minister leh MLA-te a duhsak dan a inang vek nia sawiin, Chief Minister-in a duhsak bik nia sawi awm thin chu a dik loh thu a sawi.
Nimina MNF party chhung inkhawmah he thu hi Robert Romawi chuan a sawi a. Chief Minister-in amah a duhsak bik nia sawi awm thin chungchangah “Pu Robert-a hi eng deptt nge a pek? Finance deptt atangin pawisa engzat nge a pek? NABARD loan a pe em? NEC leh Doner Ministry hnuaia priority list-ah project engzat nge dahsak a nih? tihte hi in lo chhut dawn nia,” Robert Romawia chuan a ti.
Robert Romawia Royte chuan “Covid-19 hnu lama PMJVK inti hria (party dang) an awm te hi ka awih lo” a ti a. Deptt. tinin project an siam theih vek thu sawiin, Sports atanga an huiluh tam avangin Chief Minister duhsak bik an ni tihna a nih loh thu a sawi.
MNF Adviser Robert Romawia chuan Mizoram Congress President atana Lalsawta ruat a nih chhan nia a rin sawiin, “Inthlan leh hunah Congress hi an la tling dawn chuang lova, anmahni tlakpui turin tuna an President hi an dah a ni,” a ti a. ZPM chungchang pawh sawiin, “Party pakuaa zuang lawr tawh hi Chief Minister an la awm ngai lo” a ti a. “ZPM ho chu zankhat thil thua awmna party sawn thei an tam hle”, a ti bawk.
Citizenship Amendment Act (CAA) chungchang sawiin, Robert Romawia chuan “CAA kha a hlauhawm lo” a ti a. Mizoram atanga Lok Sabha MP-in CAA a vote chhan chu NE state te duh dana tihdanglam a nih vang nia sawiin, “CAA original kha kan duh lo, parliament-in revised CAA an pass-ah khan hmarchhak tlang mite kan tel ve lo, chuvang chuan kan MP pawhin revised CAA kha a vote zawk,” a ti bawk a ni.