Aizawl : Lunglei district Congress committee (LDCC) president KL Chhawnzauva’n Congress party-in Mizoram siamthat hna an thawk thin a, MNF party-in a tihchhiat hna an thawk ve thung niin a sawi.
Congress party political session nimina Lungleia neihah he thu hi LDCC president chuan a sawi a. Hun kal tawh thlirin Congress party an sorkar apiangin Mizoramah mirethei leh kuthnathawktute tan hahdamna a thleng thin nia sawiin, sorkarah chanvo neiin neitu thinlung an pu a, an thlamuang thin a, hmasawnna nasa takin a kal thin niin a sawi.
LDCC president chuan tuna hmasawnna ruhrel lian zawng zawng chu congress sorkar hun laia thawh deuh vek nia sawiin, “MNF an sorkar ve leh thin hian nasa takin kan ram hmasawnna a tithuanawp thin” a ti a. “Tuna kan ram dinhmun chhiat zia leh beidawnthlak zia chu a taka hmutute vek kan ni, hetiang reng renga kan ramah mipui kan mangan leh buai a la awm ngai lo” a ti.
KL Chhawnzauva chuan “Sorkar hnathawk tan a hun taka hlawh lak theih a ni tawh lova, pensioner ten an pawisa khawl ve pawh an la thei lo, healthcare bill pe thei lovin Rs vbc 70 chuang min batsak te hi a mak a ni” a ti a. “Zoram dungtluanah kan kawngpui a chhiat zia te hi kan hmuh tlan vek a ni, heng zawng zawng hi eng vang nge kan tih chuan ram leh hnam aia mahni inhmangaih zawktu ten ro an rel vang a ni” a ti bawk.
LDCC president chuan Mizoram tluchhe mek siamthaa, hmasawnna rahbi thar rap leh turin Congress party lo chu rintlak tak tak an awm lo niin a sawi a. Congress-in policy leh manifesto-ah mipui bumin an tibeidawng ngai lo nia sawiin, inthlan dawna an thutiam reng reng tih loh an nei lo niin a sawi.
Hruaitu rintlak, midik leh hlemhletna laka inthiarfihlim ngam, sum enkawl thiam hruaitu mamawhna a sang ta hle tih LDCC President chuan a sawi a. “A sawia sawi thiam ni lo, a thawha thawk thiam hruaitu kan mamawh” a ti.
LDCC president chuan “Zoram mipui ten kan political party hruaitu zingah tu ber nge kan thlan dawn ngun takin ngaihtuah ila, a sawia sawi thiam kan duh chuan Congress party aia thlan tur an awm, a taka thawk thiam leh rintlak kan duh erawh chuan Congress lo chu thlan tur an awm kher lovang” a ti bawk.