AZL: Prime Minister hnena memorandum a theh luh chungchangah Hachhek bialtu MLA hian a bial mipuite hnenah thuchah sawiin, a bikin a bial chhunga kuhva chingtute’n kuhva rah hralhna kawnga harsatna an tawk chu pawi a tih thu leh a rang thei ang bera chinfel a duh tih a sawi a. “Duhamna hi danin a thunun loh chuan mi rethei zawkte’n an tawrh phah thin a. Mi duham tlemte thunun lohte avanga he harsatna pawh hi tawk kan ni. Mahni mihring puite pawhin tuar dawn mah sela pawi ti lo khawpa mahni hma sial an awm hi a pawi hle bawk a ni,” a ti.
Lalrindika Ralte hian, he hun thim leh hun harsa hian engtik niah emaw chuan a la kiansan dawn a ni tih hre chungin inpumkhatna ti chhe thei zawngin emaw, he harsatna behchhana thu dik lo leh dawt hmanga inbeihna te, mi mal inhuatna awm thei tur zawngin emaw tumahin hma la lo turin mitin a ngen.
He harsatna hian kuhva chingtute mai bakah khawtlang nun thlenga a nghawng vek avangin, an zavaia that tlanna turin harsatna an tawh lai hian thawh hona tha tak nei chungin theihna sang ber theuh hlan tur leh, tumahin politics-a hamthatna atana an hman loh nan te, pawl leh mi malin hamthatna atana an hman theih lohna turin Kohhran miten an harsatna chingfel theitu, engkim ti thei Pathian hnenah tanpuina dil a tul nia a hriat thu a sawi bawk.