Aizawl : Sports Minister Robert Romawia Royte-in Inrinni khan Kawnpui Field No 2 tlawhin, Kawnpui Field No 2-ah hian phullem phah a nih tur thu leh hna pawh tan thuai tum a nih thu a sawi.
Field pavillion-ah khawtlang hruaitute bakah Kawnpui zone football association leh Phullem field demand committee hruaitute kkawmin, Sports Minister chuan Kawnpui Field No 2 chu a area a zim deuh avangin a theih anga zauh a nih tur thu leh phullem tha chi FIFA-in a pawm quality tha hman a nih tur thu a sawi.
Mizoram state sports council engineer Lalfamkima pawhin design dan phung leh a components awm turte sawiin SASCI scheme atanga sak tur a nih thu leh Rs nuai 600 sanction a nih thu a sawi a. Retaining wall, pavillion leh security fencing te siam tel a nih tur thu sawiin, tunlai technology thar Drainboard system hman a nih tur thu a sawi bawk.
Kawnpui Jt VC Chairman Vanlalchhunga’n field tha an neih dawn avanga mipui leh thalaite an lawm hle niin a sawi a. Chief Minister, Sports Minister leh bialtu MLA chungah khawtlang aiawhin lawmthu a sawi.
Inrinni vek kan Tourism Minister ni bawk Robert Romawia Royte chuan Khamrang khua pawh tlawhin, khawtlang hruaitute hnenah Khamrang khua chu Eco Tourism project hmun pawimawha siam tuma Tourism department-in hma a lak thu leh tun hnaiah Rs nuai 800 sanction hmuh a nih thu a sawi bawk a ni.