Zote Honda Mizoram Premier League round 10 chu Thawhtanni khan Rajiv Gandhi Stadium-ah khelh a ni a. Club pariatte an inlan kim.
Round 10 hi khelmual remchan lohna avangin sawn a nih hnuah ni khat a khelh zawh tura siamrem a ni a. Inkhel hmasa berah season tha hmang mek FC Venghnuai in a mawngphah a awm Chanmari FC an sawp.
Venghnuai in minute 20 chhungin goal li an khung a, C. Ngurnuntluanga’n goal hnih khungin Peter Lalrinhlua leh Malsawmzuala Tlangte ten an khung belh a. Minute 25-naah Chanmari FC tan Lalbiaknia Royte chuan goal khat khung ve mahse second half-ah Malsawmzuala’n a goal hnihna a khung bakah Vanlalthanga’n penalty a khung belh.
Inkhel pahnihnaah semi-final la beisei Chawnpui FC leh dinhmun him a awm tluan tum FC Bethlehem te 2-2 in an inhnehtawk.
Chawnpui in MC Malsawmzuala penalty hmanga hma an hruai hnuah FC Bethlehem lamin Hmingchungnunga hmangin halftime hma leh hnuah goal khungin an chhanglet a. Chawnpui tan Samuel Laltlanthanga chuan minute 78-naah an si phurh sutin point khat a hmuhpui.
Tlai dar 4 inkhelah Aizawl FC in an hmahruaina ti zau turin Mizoram Police 1-0 in an hneh a. Inkhel a goal awmchhun hi an top scorer ni mek captain Lalchhawnkima goal khung a ni.