- Ruata
Royal Enfield chuan vawiin hian a bike thar tur te zinga mi, an 650cc khawl hmang tur Super Meteor 650 chu an phochhuah beisei a ni a, an phochhuahna tur hi 2022 EICMA, Milan, Italy-ah a ni dawn a ni.
Company lam chuan hei hi an puangzar tawh a. A teaser video tawi, an phochhuah hun tur tarlanna a darh mek tawh a. He video tawiah hian a hnung bawr awm dan tur pawh a lang ve vuai vuai a ni. Royal Enfield Thunderbird ngaina tan chuan a hnua chhuak leh Meteor hi a mawi em em tawh mai a. He bike hian 350cc khawl a hmang thung a. Tuna Continental GT leh Interceptor ten an hman ang khawl hi Meteor-ah a awm ve dawn ta a, he cruiser huanga mi bike mawi leh tha tak mai ngainatute tan leh a khawl lian hret lo nghakhlel tan chuan bike nghahhlelhawm tak a ni dawn a ni.
Tarlan tawh angin Super Meteor 650 hi Royal Enfield bike zinga 650cc khawl hmangah a pathumna tur a ni a. Thuthang awm mekah chuan Goa a neih tur 2022 Rider Mania-ah pawh an phochhuah ve beisei a ni a. Rider Mania hi tun thla ni 18 atanga ni 20 chhungin neih tur a ni. Report thenkhat chuan Royal Enfield hian he bike thar lo chhuak tur Super Meteor 650 atan hian staff training pawh an nei tan tawh niin an tarlang a. Hetihrual hian lei theih tura tlangzarh erawh tun hnai tut tut a la ni lo ang a, thlaleh emaw nakum January thla emawah an tlangzarh fel beisei a ni a, hei erawh chu company lam puanchian hun la ngaihchan zel a ngai dawn a ni.
A thlalak darh tawh atang hian a bike nihphung tur hrang hrang a hriat theih ruak tawh a. A hmaa Meteor design te ang bawkin tunlai tak siin hmanlai design kan tih, retro-styled design language a nei a, headlamp bial, windshield lian tha tak, chrome crash guard tihte kan hmu ang a. Alloy wheel a hmang ang a, a hnung fender design phek lam deuh, twin pipe exhaust system, taillamp leh turn indicator bial te a nei dawn a ni. A design tlangpui hi Royal Enfield in concept bike an lo phochhuah tawh Royal Enfield SG650 zulzuia duan a ni a, he concept bike ‘production version’ te pawh a tih theih awm e.
Royal Enfield Super Meteor 650 hian semi digital instrument console a nei ang a, tripper navigation a nei dawn bawk a ni. Tripper Navigation accessory duhthlan tur awmna Royal Enfield bike hmasa ber a ni dawn bawk a. A switch hrang hrang, non-adjustable hand lever leh a hma brake master cylinder te hi tuna chhuak mek Royal Enfield Meteor 350 ta ang deuh vek a hmang dawn a ni.
A khawl lamah chuan kan tarlan tawh angin tuna kan hmuh mek Continental GT leh Interceptor ten an hman ang 650cc twin engine a hmang dawn a. He khawl hi 648cc parallel twin cylinder khawl niin fuel injection technology hmang a ni a. Power lamah chuan 47PS a pechhuak thei a, 52Nm torque a pechhuak thei bawk a ni. Transmission pawh 6-speed gearbox tho a nih hmel a, slipper and assist clutch a nei dawn bawk a ni.
Royal Enfield hian 650cc khawl hmang tur bike dang pawh tunah hian an buatsaih mek niin a lang a. Heng te pawh hi bike nghahhlelhawm tak an ni a. India ram company duan cruiser bike 650cc khawl hmang, a chhuak thar lo awm tur hi a nghahhlelhawm hle a, cruiser bik ngainatute tana bike nghahhlelhawm leh neih ngei chakawm tur bike mawi leh tha tak a ni dawn a ni.