India chhim lam khawpui lian, Chennai-a ruah nasa tak sur chuan nunphung a tibuai hle a. Thihna thleng hriat la ni lo mah se Tamil Nadu state sorkar thuneitute chuan hmun hniam laia awmte chu hmun sang leh himah insaseng turin an ti.
Tual chhung chanchinbute chuan thing tlu leh kawngpuia chak taka tui tling avanga lirthei tang thlalak leh video an thehdarh nasa hle.
Tun tuma ruah sur hi Chenna khawpuia kum 2015 hnu lama ruah a tam ber tum a ni.
Tun ang hunah hian khawpuiah hian ruah tam tak a sur fo tawh thin a, mi thiamte chuan hmasawnna ruhrel dinna kawnga ngaihtuah thui loh leh khawpui ruahmanna fel fai lo chuan buaina lian zawk a thlen phah niin an sawi.
Khawvel pum lum mek zelin sik leh sa nasa taka a tidanglam chu mihringin a tawrhna niin an ngai bawk a. Ruah tam tak sur chiam ang chite a tam telh telh dawn niin an sawi.
Pathianni khan Chennai hmun thenkhat chuan power an nei lo reng a, hei hi power department-in venthawn thilah, electric mante thleng thei a nih avangin an titawp.
Video thehdarh thenkhatah chuan chenna ina tui nu tak lut atanga rubber lawngleng hmanga mi chengte chhanchhuah laite a lang a. National Disaster Response Force leh sipaiten chhanchhuah hna thawh hi an pui bawk.
Khawlai tam zawk chu Inrinni atang khan tuiin a chim deuh vek a, khawpuiah hnawl a tam phah hle a. Mi tam tak chuan kum 2015-a tui lian an tawrh, mi 200 chuangin an thih phahna ang mai kha a nih thu social media-ah an tar lang nasa hle.