India chhim lam state pathum – Kerala, Tamil Nadu leh Telangana-ah chuan rorel lai party-te leh an governor-te inkarah inngeih lohna lian tak a thleng mek.
State pathuma larsapte hi state sorkar chuan ‘sorkar laipuiin an pawh chet theih milem (puppet)’ ang mai niin an sawi a. Sorkar laipuiin a dah governor-te hian an huam chhung bak pela chea puh an ni a, hei vang hian regional party-te chuan party hrang an nihna dah thain tangrualin BJP kaihhruai sorkar laipui an bei mek.
Kerala, Telangana leh Tamil Nadu-ah hian rorel lai party-te chuan larsap laka lungawi lohna lantirna chi hrang hrang huaihawt tumin ruahmanna an siam.
Tamil Nadu-a rorel lai, DMK chuan Thawhlehni khan Telangana Governor Tamilisai Soundararajan chu an thenawm politics-ah ‘hnar lên’ niin an puh a. Soundararajan-i hi larsap a nih hma hian Tamil Nadu-a BJP hruaitu hlun tak niin Telangana-ah pawh Chief Minister K Chandrashekar Rao-a kaihhruai TRS chuan state university-a a inrawlh danah a lakah an lungawi lo hle bawk.
Thawhlehnia DMK chanchinbu, Murasoli chuan Governor Soundararajan-i hian an party-a politics chhungkaw lawkte chawrchhuahna chu Telugu niin a sawi tih an tar lang.
“Telangana governor hian Tamil Nadu-ah politics thil ti suh se, hei hi a hna a ni lo. Bâng sela, Tamil Nadu-ah politics chu rawn khel mai rawh se,” an ti a. Hetih rual hian Tamil Nadu Governor RN Ravi pawhin ‘a ramri chin a pel a, inhnialna a thlentir nasa’ niin an tar lang bawk.
Soundararajan-i chu politics leh danin a huam chinah thiltihtheihna a nei a, chu chu ram zahawmna hnuaiah a nih thu an tar lang bawk.
DMK pawhin thla tirah khan an state MP-te hnenah lehkha thawnin Ravi-a chu ‘dan bawhchhiaa a chet avangin’ larsap atanga paih a nih theih nana hma lakpui turin an ngen tawh a. A chet dan leh a thil sawi duh dante chuan a nihna chelh turin a ‘fit tawk lo’ niin an sawi.
Tamil Nadu-ah hian bill 20 vel, governor-in a pawmpui tur tang a awm mek a. April khan DMK hruaitute chuan Ravi-a duh lohna hi an lo lantir tawh a, hei hi president hnena state assembly-a vawi hnih an pass tawh, NEET Exemption Bill a thlen duh loh vang a ni.
Telangana Governor Soundararajan-i hi state sorkar nen an inhmuthiam lo nasa hle a. State Education Minister Sabitha Indra Reddy chu University Grants Commission rules-in a phut anga state university 15-a common recruitment board kalpui dan tur sawi dun turin a hranpa ngatin a ko.
Soundararajan-i hian kum thum liam ta chhungin vawi tam hrilh nawn a nih hnuah hmun ruak awmte hnawh khah a nih loh tiin a zawt a ni.
TRS kaihhruai state sorkar chuan larsap hnenah hian bill an thawn a, heng zinga pakhat hi a la tihkhawtlai mek pariat zinga pakhat pawh a tel a. Heng bill-te hi zirtirtu leh zirna ina thawktu dang lakna tur a ni a, medical university-a mi bik tur erawh a tel lo va, a pawmpui turin an thawn a. A lo pawmpui duh loh avangin Telangana university zirlaite pawh an thinrim hle a, ‘sorkar laipui pawh chet theih milem’ tia sawiin Nilaini hian Raj Bhavan thleng lungawi lohna lantira kawng zawh an tum.
Governor Soundararajan-i hian dan angin thil an ti lo nia puh a ni bawk a. Kumin Republic Day-ah pawh thu a sawi lo niin an sawi a. State assembly-ah pawh thu sawi tur a nih laiin a duh lo niin an sawi bawk.
State sorkarin an beihna lian tak dang chu cabinet-in larsap quota-a MLC atana TRS hruaitu, Kaushik Reddy ruat tura tihna a pawm duh lo niin an sawi bawk.
Kerala Governor Arif Mohammad Khan pawh CPI(M) kaihhruai sorkar nen an inep nasa a. Malayalam TV channel lian taka thawk chanchinbumi pahnih pawh Ernakulam guest house-a thuthar lakhawmtute a kawmna atangin a hnawt chhuak.
Governor Khan hian heng chanchinbumi leh an channel chu Pinarayi Vijayan-a lam tang langsar lutuk niin a sawi a. An state-a chanchinbumi pawl chuan a chet dan chu ‘mipui rorelna kalhmang lo’ tiin an sawi a, hei hi chanchinbumi a hnawl vawi khatna pawh a nih loh thu an sawi bawk.
Thla hmasa khan chanchinbumi thenkhat chauh kovin press conference a nei a, a koh ve loh a tel ve tumte chu a luhtir phal ve lo niin an sawi.
Kerala Union of Working Journalists chuan Thawhlehni khan governor chenna in kiangah lungawi lohna an lantir.
Thawhtanni khan Khan hian state sorkar chu chovin ‘ka pisaah min rawn su rawh u’ tih leh ‘kawngpuiah min bei rawh u’ a ti a. Hei hi CPI(M)-in Raj Bhavan hmaa November 15-a lungawi lohna lantir an tum a chhanna a ni.
Party chuan larsap hian dan siam tur tam tak pawh a tikhawtlai niin an puh bawk.