Hnahthial Football Club chuan Assam a football inelna kalpui mek 14th Bodousa Cup semi-final khel turin Thawhlehni khan hnehna an chang.
Tinsukia a inkhelah Mizoram Football Association in a tirh Hnahthial FC hian Hills United FC an hmachhawn a, 3-2 in an hneh.
Hnahthial FC tan hian Remruatfela, Lalfelfamkima leh PC Rosangzuala ten goal an khung a. Goalkeeper Remlalliana che tha bawkin man of the match-ah an thlang.
Mizoram hian Ningani chawhnu dar 2 hian Gorkha Training Center nen semi-final an khel leh ang.
Bodousa Cup hi Assam Football Association hnuaia tournament ngaihhlut zing ami a ni a, invitation tournament niin Mizoram Football Association pawh sawm an ni a. MFA lamin Hnahthial FC hi kal turin a tir.
Mizoram hian final an luh chuan an hmachhawn theih tur zingah vawi thum champion tawh Oil India FC leh champion lai Luca SC te an la dam.