Aizawl : School Education Minister Lalchhandama Rate-in nimin khan a bial chhunga YMA, Palsang branch kum 75 tlin lawmna hmanpuiin, “Palsang khuain a mamawh ber chu zirna a ni” a ti.
Education Minister chuan “zirna chu mi hmantlak leh mipuitlinga min siamtu a” tiin, zirna ngaipawimawh khua apiang chu khaw changkang leh dingchhuak tamna khua an ni thin niin a sawi a. Chutiang ni thei tur chuan zirna ngaipawimawh nasa leh zual turin Palsang mipuite chu a chah a ni.
Kum 1952-a din a nih atanga tun thlenga meimit lova nung taka Palsang branch YMA a kal theih chhan YMA hruaitute chhuanawm a tih thu bialtu MLA chuan a sawi a. YMA chu pawl thianghlim a nih thu leh a thil tumte hriatchian a pawimawh thu te, Mizo ram leh hnam tipumkhattu, tanpuingaite tanpui thintu a nih thu sawiin, “YMA ‘VIP’ chu țanpuingai, mi chhumchhia leh pachhiate, harsatna hrang hrang tawk te hi an ni” a ti a. Khawtlangin kawng hrang hranga a thlamuanpui ni thei zel turin Palsang YMA branch te chu dushakna a hlan bawk.
Bialtu MLA, Education Minister ni bawk Lalchhandama Ralte chuan Palsang branch YMA Platinum Jubilee lungphun a hawn bakah MLA fund-a sak Palsang ‘MHIP RUN’ a hawng nghal bawk a ni.