Aizawl: PHE department leh Central YMA tangkawpin nimin khan Aizawl daifem leh ualau lai hmun rukah Faina hnatlangpui an huaihawt a, mi 650 an thawkchhuak.
Hnatlangpuia thawkchhuakte hi Health minister Dr R Lalthangliana’n MINECO tualzawl atangin a vailiam a, PHE leh YMA thawhhohna chu ropui a tih thu sawiin, faina piah lamah environment humhalh lamhawi tarlan tel a ni chu lawmawm a tih thu leh lui hnar thenfai pawimawh zia leh ramngaw humhalh a tul zia a sawi.
Dr R Lalthangliana chuan “Faina chuan hriselna a keng tel a, hrisel tur chuan mahnia hun insiam a ngai” tiin, ram hmangaihna chuan hriselna leh faina a keng tel tur a nih thu a sawi a. “Tlawmngai pawl, mi zawng zawng huap YMA kan nei hi Mizote chakna hnar a ni” tiin, faina hnatlangpuiin rah duhawm a chhuah theih na turin duhsakna a hlan.
Central YMA President Lalngheta pawhin thusawiin, tuihna humhalh kawngah PHED chu thawhpui nuam a tih thu a sawi a. Mahni in leh lo leh a chhehvel vawn fai a pawimawhzia thu a sawi bakah bawlhhlawh paih danah fimkhur tur te, kawng engkimah, a lang leh lang loah pawh fai leh thianghlim a pawimawhzia hre thar leh turin mipuite a chah.
PHED leh Central YMA chuan Coordination committee dinin, he committee hian Fai leh thianghlimna kawnga mipui zirtirna runpui atan Faina Hnatlang neih hi an rel a, Aizawl daifem leh ualau lai hmun ruk (6) thlan bikah Aizawl khawpui chhung Branch YMA te leh PHED thawktute nen Faina Hnatlang neih hi ruahman a ni.
He faina hnatlangpui ah hian Aizawl khawpui chhunga Branch YMA 108 atanga thawk chhuak leh PHE staff te nen, an vaiin min 650 an hnatlang a, bawlhhlawh paih motor 407 sawmhnih pahnih (22) rawih a ni bawk.
A huhova hnatlanna tur hmun ruat – Aizawl helna kawng Chite Lei atanga Silai-mual; Mualdungsei atangin PTC peng ; MINECO (Gate No 1 atanga Gate No. 2); Tlawng kawng (Mission Vengthlang atanga Di-hmunzawl) ;Durtlang Leitan atanga Bawngkawn leh Durtlang Leitan atanga Sihphir (Sakawrhmuituaitlang) ah te hnawmhnawk tih fai a ni.