La Liga champion lai Real Madrid chu tun season a league inelnaah a vawikhatna atan an tlawm a. Rayo Vallecano nen inkhelin hmahruaitu ni hmasa mahse an khingpuite lakah chesualin Rayo in 3-2 in an lehthal.
Estadio de Vallecas a inkhelah Rayo tan Santi Comesana chuan minute 5-naah goal a khung nghal a. Hei hi first half-ah Real Madrid in Luka Modric-a penalty khung hmang leh Eder Militao tauh goal hmangin an chhanglet. Halftime hma in Rayo in goal an khung leh hman thova, Alvaro Garcia chuan an si phurh sutin 2-2 in chawlhlawkah an inhnehtawk.
Second half-ah Rayo in penalty an hmuh chu Thibaut Courtois chuan a dansak a. Mahse Courtois hi Oscar Trejo-a’n a pet hmain a goal line a lo chetsawn san avangin pet that tir a ni a, trejo hian an chakna goal a khung.
An tlawm avangin La Liga champion lai in table chung bera kir lehna hun an hloh a. Inrinni zana Almeria laka hnehna chang Barcelona in hma an hruai mek.
Hetihlai hian season tha hmang mek Rayo in pariatna an luah a, point hnih chauhin Europe huap inelna inchuhnaah an hnufual tawh. A zawna vawi thum an chakna a ni bawk.
Rayo manager Andoni Iraola hnawhchhuah a nihna inkhel hi a zawh hnuah Real manager Carlo Ancelotti chuan, “An chetthatlai a ni tih kan hre vek a, hei vang hian a mak vak lo. Keini aiin an kheltha zawk a, ball petsual pawh an nei tlem zawk. Chak phu zawk an chak a ni.” tiin an khingpuite a fak.