China chuan thla ruk chhunga a hmasa ber atan Covid vanga thi an nei leh ta a, thuneitute chuan an khawpui ber chuan hripui a len hnua dinhmun khirh ber hun lai an tawng mek tih an sawi.
Inrinni atang khan Beijing-ah mi pathum an thi tawh a, mi 5,229-in China-ah hian hripui an thihpui ta.
China hian ‘zero-Covid policy’ a kalpui mek a, mipuite pawhin hei hi an duh lohna nasa takin an lantir thin a, hetih mek lai hian thi an awm thar.
Mi maktaduai tel kharkhip hmak hmak an ni thin leh mi an khung hrang nasa lutuk chungchangah inhnialna a tam hle.
Beijing-ah pawh Haidian-ah chuan inkharkhip kalpui niin dawr, sikul leh thingpui dawr an khar a, pawn chhuak thei lovin mi maktaduai thum vel an awm mek.
Khawpui tlawhtute pawh an thlen atanga ni thum chhungin hri an kai leh kai loh endik zel tura tih an ni a, an him tih a chian hma chu an pawn chhuak thei lo.
Mi maktaduai 21 chuang chenna, Beijing-ah hian Thawhtanni tlai dar 3:00 thleng khan hri kai hmuh thar mi 316 an awm tih Reuters news agency chuan a tar lang a. Pathianni chawhnu atanga thi thar leh hi putar kum 87 mi a ni.
Beijing-a Municipal Centre for Disease Control & Prevention Deputy Director Liu Xiaofeng chuan an dinhmun chu a khirh rih hle niin a sawi tih news agency chuan a tar lang.
Thawhtanni chawhma lamah khan municipal thupuangtu chuan Beijing hian hripui laka inven leh thununna kawngah ‘khauh leh uluk zawka thil kalpui a mamawh’ tih a sawi niin China Daily chuan a tar lang bawk.
China hian zero-Covid policy khauh taka a kalpui hian ram dangte nena khaikhinin thihpui an tlem phah hle niin a sawi a. Hetih lai hian mi thiamte chuan tuna thi an chhinchhiah zat aia tam daih hi a tak takah chuan thihpui an awm an ring a. Mipui pawhin inkhuahkhirhna hi an ning tawh hle.