Aizawl: Champhai District Level Narco Coordination Centre (NCORD) Committee chu nimin khan DC Conference Hall-ah an thukhawm a, kumin January 1 atanga November 21 chhungin Champhaia Police leh Excise-ten ruihhlo Rs. nuai 3,894.73 hu an man tih tar lan a ni.
NCORD Chairman James Lalrinchhana, District Bawrhsap kaihhruaia thutkhawma Addl. SP C.Lalengliana’n a tar lan danin Champhai District Police-ten kumin January 1 atanga November 21 chhungin Rs. nuai 630.67 man hu heroin kg 27.329, Rs. nuai 1,637 man hu Methamphetamine mum 8,18,500, Rs. nuai 126 man hu Pseudoephedrine mum 1,80,000 an man a; ND&PS Act, 1985 hnuaiah thubuai 80 an ziak lut a, mi 104 man niin chung zinga 27-te chu ram dang mi an ni.
Commissioner of Excise & Narcotics Vanlalvura Ralte-in ruihhlo an man dan a tar lan danin, Champhaia Excise & Narcotics Department-in January 1 atanga November 21 chhungin Rs. nuai 103.37 man hu heroin kg 8.614, Rs. nuai 1,397 man hu Methamphetamine mum 4,65,700, Rs. 53,396 man hu Pseudoephedrine mum 8,896, Rs. 3,840 man hu ganja kg 3.2 leh Rs. 2,180 man hu Alprazolam mum 218 an man tawh a, ND&PS Act hnuaiah thubuai 54 ziak lutin mi 60 an man a, heng zinga mi 17-te hi ram dang mi an ni.
Thutkhawm kaihruaitu, Bawrhsap James Lalrinchhana chuan, Champhai district-ah ruihhlo do kawnga thawhhona tha tak a awm thin chu fakawm a tih thu sawiin, “Ramri depa awm Champhai district chu ruihhlo tawlhna kalkawng bulpui ber a nih avangin tha thlah lova tanrual reng a ngai a ni,” a ti a, tun hnaia hlawm lian pui puia ruihhlo tawlh ruk man a nih thu leh ruihhlo do nana thahnemngai taka tha thawhtute chhuanawm a tih thu a sawi bawk.
NCORD Convener Lalrinpuia Varte, SP Champhai pawhin thu sawiin ruihhlo chu ralthuam anga hmangin ram sum leh pai tichhiaa national security thlenga nghawh pawi thei thil a nih avangin sorkarin a ngai thutak hle tih a sawi bawk a ni.