Union Minister of Road Transport and Highway Nitin Gadkari-a’n Mizoram sorkar chu Mizoram chhunga kawngpui siam chungchangah hna tikhaihlaklo turin a hriattir niin BJP Mizoram President Vanlalhmuaka’n a sawi.
BJP State Office-a chawlhkar thar inhlanna leh political session nimina neihah thu sawiin Vanlalhmuaka chuan tunhnaia 4-lane kawngpui zangnadawmna chungchangah revenue leh forest lamah buaina awmin, ram neitute’n kawng dangin hnathawh tur an tikhaihlak chu state sorkarin mawh la ngam loah puhin, “Mipuite chu kal ngaihna hre lovin a siam a ni,” a ti.
Vanlalhmuaka chuan November 11, 2022-a Union Minister Nitin Gadkari hova Chief Minister Zoramthanga leh sorkar mipawimawhte thutkhawmah Mizorama project work hrang hrang kal mekte chuan duhthu a sam lovin, state sorkarin harsatna an siam thu leh harsatna awm te a rang lama chingfel turin a hriattir thu leh, zangnadawmna chungchanga buaina pawh a rang lama chingfel turin a hriattir niin a sawi.
BJP Mizoram President hian Mizoram chhunga Kuhva chingtute buaina pawh sawiin, “Mizoram a kuhva chingtute buaina leh harsatna chinfel dan chu Mizoram sorkar hian a hre lo ni loin, a chingfel duh loh zawk a ni,” tiin, kuhva chungchanga Mizoram sorkar dinhmun chu muhil muhil der kaihthawh tum a tho thei lo nen a in ang reng niin a sawi a. Mizoramin a tih tur a tih loh avangin kuhva chingtute hian harsatna an tawk mai a nih thu leh mawhpuh tur dang an awm lo a, a mawh phurtu diktak chu Mizoram sorkar a nih thu a sawi bawk.
“Mizoram hian Mizoram tan a pa ni ngam, mawhphurhna la ngam, thil ti tak tak ngam kan mamawh a, chutiang mawhphurhna la ngam awm chhun chu BJP te hi kan ni a, chutiang kan tih theih dawn avangin kum 2023 election ah Mizoramah Pu Modi kaihhruai BJP Sorkar a piang dawn a ni,” a ti bawk.