Chief Minister Zoramthanga hova nimina Chief Minister Cabinet Meeting Room-a Council of Ministers thukhawmin Bangladesh atanga sahimna zawnga Mizorama raltlante chu an theih ang anga lo tuamhlawm zui zel an remti.
Council of Minister thukhawm chuan tun hnaia Bangladesh atanga sahimna zawnga Mizorama raltlan, Parvaa awm mekte chungchang an sawiho a, raltlante chu an lainat thu sawiin, an theih ang anga lo tuamhlawm zui zel ni se an ti a ni.
Thutkhawmah hian sorkar department hrang hrang atanga thu pawimawh thlente ngaihtuah a ni a. Home department hnuaia Border Management Cell siam leh a tul anga post siam rawtna lut chu a thuphunga pawm a ni a. Constable 118 chu honorary promotion-a head constable-a kaisan tura rawtna lut pawh an pawm.
Heng bakah hian P&E department-in Mizoram Energy Conservation Building Code Rules, 2022 rawtna an thehluh te, Sinlung Hills Council chungchang rawtna hrang hrang – The members of the Sinlung Hills Council (Disqualification on Ground of Defection) Rules, 2022 te, The Sinlung Hills Council (Amendment) Bill, 2022 te, The Mizoram (Election to Sinlung Hills Council) (Amendment) Rules, 2022 te leh Mizoram Code on Wages Rules, 2022 atana LESDE-in draft proposal an chhawp te, art & culture department-in Mizoram Ancient Monuments & Archaeological Sites & Remains Bill, 2022 siam thatna (amendment) tur an chhawp te, law & judicial department atanga commerce & industries ram leh buiding chu Lunglei District Court Building sakna leh zauhna atana pek rawtna leh land revenue & settlement department atanga The Indian Stamp (Mizoram Amendment) Bill, 2022 lut te chu pawm an ni bawk.
UD&PA-in Mizoram Municipalties (Facilities to Mayor, Deputy Mayor, Chairman, Vice Chairman & Councillors) Rules, 2018 siam tha (amend) tura rawtna an siam te, The Draft Mizoram Prohibition of Employment as Manual Scavengers & their Rehabilitation Rules, 2022 leh Proposal for transfer of functions to Lunglei Municipal Council te chu pawm a ni a. June 10, 2019-a Council of Minister thukhawmin Champhai CHANEM building law & judicial department kuta a lo dah tawh sut tura rawtna siam chu a thuphunga pawm a ni bawk a ni.