Tunlai hian Mamit district chhungah silai nena ramsa leh sava veha ram chhuak an tam thin avangin Mamit Bawrhsap Lalnunhlua chuan tun hnai khan ramsa leh sava tihhlum khapna thupek a chhuah.
Bawrhsapin Mamit district chhungah mi tumahin silai, airgun leh hmanraw dang hmangin ramsa leh sava vehin an tihlum emawm an kaphlum emaw tur a ni lo tih khapna thupek a chhuah bawhzui hian Mamit Environment, Forest & Climate Change (EF&CC) department chuan silai panga an man tawh.
Mamit EF&CC department a thawkte chuan Mamit khaw dai hmun hrang hrangah silai nena sava leh ramsa kah tuma ramvakte an chang thin a, hetah hian ramvak turte kut atangin silai panga an man tawh a. Bawrhsapin thupek a chhuah hma pawh hian silai pathum an lo man tawh a. Heng an silai mante hi department strong room-ah hrensak an ni.