- Brian Hauhnar
India hmarchhaka infiamna kutpui lian ber North East Olympic Games tum hnihna chu Meghalaya khawpui Shillong-ah zawhfel a ni ta a, kar khat zet awh he hunpui hi tunlai hla lar 24×7 an sawi ang em chuan buaipui ve thei lo mah ila keini media team mi pali te pawhin a theih ang angin Mizoram team chettlatna hrang hrangte kan kartawn ve sek mai.
Mizoram team FIR (First Information Report) kan han siam sap sap a, kan hlawmkhawm a, Aizawl lam media hmunpuiah kan thawn chho thin. Result ngawr ngawr report kha kan kalchhan a ni lova, Meghalaya state-in eng tiang chiahin nge Sports hmunhma (Infrustructure) an neih dan leh inbuatsaihna hrang hrangte kha kan hriat duh pakhat a ni a, Mizoramin thleng ve dawn ila kan thleng zo ve ang em? Eng laiah nge kan tluk loh a, tan kan lakna tur tihte kha hriat kan tum a ni.
Shillong boruak nawm hunlai a ni a, hmarchhak state hrang hrang infiammi 3000 chuang fuankhawmte pawhin nuam an titlang niin a lang. Kawng hrang hranga NEOG ka hmuh dan leh Mizoram dinhmun, rual ka awhna te leh state dang kan tluk lohna nia ka hriatte ka rawn tarlang dawn a ni.
Thlengtu state inbuatsaihna
A thlengtu Meghalaya sawrkar inbuatsaihna a kilh kelhin hre lo mah ila an bei nasa tih a hmun ngeiah a chiang.
Kumin March thlatir khan Chief Minister Conrad Sangma chuan an State Budget session-ah 2022-23 financial year atan kum hmasa aia sum an dah chu 13% a an tihpun thu a sawi a, an sum dah zat chu cheng vaibelchhe 298 a ni. Sum hmanna tur ruahmanna a tam viau a, tuna an siam that mek Polo Ground-a JN Stadium atan pawh Rs 40 crore zet an dah a ni. An state sports budget hi NEOG-ah an hmang em tih ka hre chiah bik lova, eng pawh nise a hre awm deuh ka zawha min chhan dan chuan NEOG atan Rs.18-20 crore budget an nei a ni awm e!
An stadium ropui leh tha ber JN Stadium an cheithat mek avangin hmun dangah venue pui ber (Main stadium) an buatsaih a ngai a, chumi atan chuan SAI NEHU Athletics field an hmang mai a, harsatna an nei lem lo. Entu mipui thutna tur zawng zawng, hmanraw zang chi Alluminium hmangin an din a, awlsam taka thiah leh mai theih tur chi a ni. Chutiang zelin venue hrang hrangah a chung nei leh nei lo te, dawhsan awm chi leh chi lo te, inthiarna tur ekin kal thei ni chiah silo, senghawi awlsam tak tur ni si te an din thleh thluah mai a, media centre thlengin an ti tha viau mai.
Infiammi ei in tur an pek danah te, official duty (technical staff, volunteers) hrang hrang leh thlenna thlengin a tha tawk hle a, mark pek tur ni ta se mark 100-ah mark 80 tal chu ka pe ngei ang.
Mizoramin thleng ve dawn ta ila hetianga ropui hian kan thleng ve thei ang em? tih kan inzawt kan inzawt mai a, rual awh a na viau. State level sports Association engemawzat training hall pawh nei lo an la awm lai leh incentive cash award pawh kum tin chu sawi loh, kum engemaw zat hnuah kan inpek hram theihna ramah chuan an budget te pawh keini ai chuan an u deuh niin a lang.
Hma kan sawn nge kan hnungtawlh?
NEOG-ah hian Mizoram atangin infiammi 262, officials 65 bakah mi pawimawh dangte nen mi 336 zet an tel a, a pumpuiah Mizoram chu 6-na a ni.
India hmarchhak-ah State pariat awmin kan chungah state 5 zet an awm a, phul lem tam tak phah a nih hnu hian kan ropui phah em em hran lo tih a lang. Chutih laiin a tum khatna nena khaikhin erawh chuan NEOG hmasa zawk Manipur (2018) aiin medal ka la tam hret thung. Manipur-ah khan Mizoram chuan gold 8, silver 15 leh bronze 29 lain a pumpuiah 4-na a ni. Kuminah gold 15, silver 30 leh bronze 60 lain hma chu kan sawn ngei mai a, mahse State dang result enin keini aiin hma an sawn zawk tih a lang.
Kumina chetha ber Manipur chuan gold medal ringawt pawh 88 zet mai an la hem mai a, pahnihna Assam pawhin gold medal 79 zet an la. Pathumna Arunachal chuan gold medal 39, palina Meghalaya chuan gold medal 36 an la thei a, kan chung chiahah Nagaland chuan gold medal 18 an la bawk. Gold medal chin chauh ka tarlanna chhan pawh tehna lian ber a ni a, silver medal leh bronze medal sangkhat ai pawhin gold medal 1 a hlu miau a ni. A bikin Manipur leh Assam kan phak lohna hi a sang hle mai a, ngaihtuah a ti thui hle.
Tun hma chuan North East Olympic Games hi Noorth East Games tih a ni thin a, Mizoramin kan thlen hnuhnung ber chu kum 2012 kha niin RG Stadium sak tan tirh chhoh lai la zawh hmasa si kha a ni. Manipur leh Assam te hi eng tik lai pawha kan el thin kha an ni a, tunah chuan kan pha ta lo hle. Kan hnuaia awm reng thin Meghalaya, Arunachal leh Nagaland hnuaiah hial tunah chuan kan awm ta!
Tanlak a ngai
Games-ah chuan medal tally hi tehfunga hman a ni a. Olympic Games, Asian Games, Commonwealth Games, National Games, NE Games etc. ah medal tally hmanga tehna siam vek a ni a, individual leh team game-a medal lak theih zat a in ang vek a ni. Players 11 khelhna football team-in medal 1 an thawkchhuah thei a, team game dang pawhin chuti bawk. Chutih laiin combat games leh a dang dangte erawh chuan mahniin medal an la mai a, chu mai ni lovin mimalin gold medal tam tak an la thei. US swimmer Michael Phelps chuan 2008 khan Beijing Olympics-ah gold medal 8 zet a la thei a ni. NE Olympic Games-ah pawh hian swimming leh infiamna dangah mimala medal engemawzat la an awm a ni. Athletics leh swimming te hi medal tam zualna an ni reng a, archery te leh combat games hrang hrang, weight category-a then chiahte pawh medal lak tur a tam hle. Football-a champion hi a hlu hle a, mahse Games-ah chuan medal pakhat a ni mai a, chutiangin team game-ah chuan medal inchuh kha a tam thei lo.
NEOG Shillong-ah hian Archery atang ringawtin Assam chuan gold medal 11 an la thei a, Manipur chuan 9 an la. Athletics-ah Assam chuan gold medal 12 an la thei a, Manipur chuan 10 an la ve bawk a, Archery-ah Mizoram kan nil a, athletics-ah silver 1 kan la hram. Assam chuan swimming atang ringawtin gold medal 20 an la thei a, hei ringawt pawh hi Mizoramin kan phak lo nghal ringawt tihna a nih chu! Mizoram chetthatna ber chu Boxing niin gold medal 5 an la a, Table tennis-ah gold 4, taekwondo-ah gold 3 kan dawng bawk.
Lang chiang tak awm ta chu, medal tamna individual game – Shooting, archery, athletics, swimming leh combat game hovah hian Games atan insawrbing ta ila, vision 2024 ti a bul tanin tun atang hian tih tak zetin nawr ila, kan ziaawm ngei ang. Phul lem phah chiam lam a ni ber lo, Mizo kan ropuina tur kan thlan thiam a ngai. Ka thianpa pakhat chuan, ‘Mizoramah chuan phul lem hmangin game kan khel a, mi state chuan sports game tak tak an khel thung” a ti!
Mizoram Sports hi
Prize money dawn tur an siam aia tama player duhzawng ramdang atanga lalut ngam khawpa huaisen leh sports ngaina kan ni. Kan nawr lam chu kan nawr na viau zel a, kaihhruai pawh nuam tak kan ni. Sports Association hrang hrang hruaituten mahni insengsoin naupang an kaihruai a, chutihlaia sawrkar puihbawmna (financial assistance) erawh a beitham hle. Sum leh paia inpuih chiam hi hmasawnna bul chu a ni hauh lo, chutihlaiin an training-na leh inkhelhna tur hmunhma siamsak tal erawh sawrkar bat a ni ve. Tunah hian kan sawi tak angin medal tamna combat games zingah mahni puala training hall nei chu tlemte an la ni.
Vawiina Olympic game/discipline ni lem lote hi nakin lawka Olympic-a la telh turte an ni a, tuna an telh mekte pawh telh zui tak loh a awm nual dawn. A pawimawh berah chuan Mizote thatna game kan hriat a tul a, Sawrkar hian kalphung mumal tak nei se, khawvel huap, Asia khawmualpui, India leh hmarchhak thleng pawha kan ropuina tur game hi na zawka a kalpui a ngai. Infrustructure hi hmasawnna bul a nih rualin player hmasawnna tur promotional lam hi na zawka kalpui a ngai a, kan tihphur a, kawng kan siamsak a pawimawh tak meuh meuh a ni.
A tawp berah chuan kum 2024-ah NorthEast Olympic Games hi Nagaland-in an thleng dawn a, an khawpui pathum – Kohima, Dimapur leh Mokokchung-ahte Games nghah a ni ang. Mizoram dinhmun chu kumin aia tha leh sang zawk turah beisei phawt mai teh ang.