England in thawm ring tak neiin 2022 World Cup bul an tan a. Iran lakah goal ruk khungin chiang takin 6-2 in hnehna an chang.
Group B inkhel hmasa berah thil thleng a tam a. England tan erawh a duhawm lam hlir niin Gareth Southgate-a pawlten duhthusamin tournament-ah ke an pen nghal.
Khalifa International Stadium a inkhelah England tan midfielder Jude Bellingham chuan minute 10-naah goal a khung a. Luke Shaw cross chu tauh lutin kum 19 leh ni 145 a upa Borussia Dortmund midfielder hi England tana World Cup a goal khung thei naupang ber dawttu a ni a. Michael Owen chiah a aia naupang an awm.
Three Lions in halftime dawnah an chungnunna inkhel an dahtha a. Euro final a penalty a khung loh avanga diriam hlawh tak Bukayo Saka chuan an goal hnihna mawi taka a khung hnuah Harry Kane siamsak chu Raheem Sterling-a’n a khung.
Secoind half-ah England in hna ngai an chhunzawm a. Saka chuan a goal hnihna a khung.
Iran fans ten au na hun an nei ve thova. Minute 65-naah FC Porto goal thun khawl Mehdi Taremi in goal a khung.
Mahse England tan substitute Marcus Rashford chuan an goal nga na a khung hnuah huntawp dawn lamah Jack Grealish-a’n an goal hnuhnung ber a khung a. Inkhel tawp hma in Taremi chuan John Stones penalty chawi a khung ve leh bawk.
Hma kan sawn a la ngai
Point thum an hmu a, goal ruk an khung. |ha takin bul tan mahse England manager Southgate-a’n duhtawk thei an la ni lo tih chiang takin a sawi. “Bul kan tanna a ni a, thawm ring tak kan nei nghal. Mahse kan hmabak match hnihah hei aia tha zawka kan khelh hi a ngai dawn.”
“Khatiang zat a chak tur leh khatiang taka inkhel kan thunun thei kha kan lawm tur a ni. Bul tan dan tha tak a ni a. Mahse goal hnih kan chhuah tur kha a ni lo. USA lakah chuan tihsual kan neih a thiang tawh lo.”
“Inkhelh chhung zawng khan minute 24 pek belh niin ka hria, chuvangin inthlahdah lova insawrbing hun chhung a ngai rei hle.” tiin inkhel a thlirlet.
Oranje an lo kir e
Kum 2018 World Cup an khelh phak loh hnuah Netherlands in hnehna changin 2022 World Cup bul an tan a. African champion Senegal 2-0 in an hneh.
Al Thumama Stadium-ah team tha pahnih an inhmachhawn a. Goal an khung lawk lo.
Minute 84-naah Chelsea goalkeeper Edouard Mendy chuan Frenkie de Jong ball vawrh luh chu a nam chhuah hma in PSV Eindhoven forward Cody Gakpo-a’n goal-ah a khung a. Substitute Davy Klaassen chuan minute 99-naah an goal hnihna a khung.
Louis van Gaal chuan, “Hnehna tha tak a ni. A mawi ber lova, first half-ah ball kan hloh hnem chungin chance vawi nga kan siam. Second half-ah kan zia deuh a, mahse kan inkhel tawk hle. Goal hnih kan khung bakah chance tha vawikhat dang kan nei.” a ti.