Aizawl: Mizoram Government Adhoc Aided High School Teachers’ Association (MIGAHTA) chuan adhoc aided high school-te chu an dinhmun tur provincialise status-a hlang kai thuai turin sorkar an ngen.
MIGAHTA chuan nimin khan Chanmari YMA-ah provincialise status-a hlang kai tura sorkar an ngenna kal mek chungchangah consultation meeting an nei a, resolution siamin, “Mipui mamawhna avanga vantlangin an din school; April 1, 2008-a ad hoc status-a hlan kai tawhte hi kan sokar hian a hma thei ang berin provincialised status-ah hlang kai rawh se,” an ti a, hemi chungchanga hmalak dan tur kawng hrang hrang pawh an duang nghal.
MIGAHTA chuan adhoc aided school-te chu kum nga dan zelh upgrade a nih thin laiin tunah hian kum 14 zet ad hoc status-ah an awm tawh tih sawiin adhoc school-te provincialise tur hian sorkar tan pawisa tam tak sen belh a ngai tawh lo va, half allowance chiah pek belh mai tur an ni a, khawtlang tana kum tam tak hlawh pawh nei mumal lova an lo thawh tawhnate zah dersak chunga an nihna tur dik tak provincialised status-a upgrade thuai turin sorkar an beisei tih an sawi.
Kum 2018-a general election dawn khan aided school zawng zawngte upgrade vek turin tuna sorkar hotute hian khawtlang mipui hmaah hmun hrang hrangah an lo au chhuak hlawm tih sawiin, “Hei hi kan mit leh bengah a la cham reng a, a taka chantir ni tawh se kan ti tak zet,” an ti bawk.