Inrinsiakna karah BTS member Jin-a’n thla thar mai hian sipaia tan ngei ngeina tur Dan chu a takin a zawm dawn ta nia hriat a ni.
South Korean Dan ah chuan pianphunga harsatna nei lo mipa, kum 18 chung lam tawh phawt chu kum hnih tal sipaia an tan ngei ngei a ngai a. BTS member te chungchanga mipui ngaihdan inang lo leh political debate thlenga sawi hat hat tling chungchangah hian thu chiang tak hriat thuai an beisei.
An mahni enkawltu HYBE chuan thla hmasa khan BTS member pasarih te hi ram danin a phut leh beisei ang ngeiin sipaia an tan tur thu a lo sawi tawh a, kum 2025 ah chuan an tlingtlak theih vek an ring. Band member zinga upa ber kum 29 mi Jin hi a hmasa ber tur a ni ang.
South Korean media te chuan K-pop idol Jin hi December 13, 2022 hian sipaia official taka a luh tur thu an tarlang chuai chuai tawh a, HYBE erawh chuan hemi chungchangah hian official thuchhuah a la nei lo thung.
Ministry of Culture, Sports and Tourism (MCST) Minister Park Bo Kyun chuan October 5 khan BTS member te’n military service an zawm leh zawm loh tura inhnialna leh thu inchuhna nasa tak awm mek chu December thla khian thutlukna siama chin fel a nih tur thu a sawi a.
BTS member zinga upa ber Jin hi 1992 a piang niin, kuminah kum 30 a tling ta chiah a. 2020 Military Service Act (Amendment)-ah chuan sipaia a tan ngei ngei a ngai.
Amaherawhchu, he dan hi kalpui chhunzawm a nih dawn chuan BTS hian an pumpelh thei tho bawk. Kawng lehlamah chuan, exemption siam lo ni ta ang se, kumtharah Jin hi sipaia a luh a ngai.
Member dang- RM, Suga leh J-Hope te hian kum 30 an hnaih tan tawh a, an ni pawh sipaia sengluh ve theih tur tho an ni ang.
Koream mipa, kum 18-28 inkar te chu thla 20 tal sipaia tang tura phut leh beisei vek an ni a, dan tharah hi chuan BTS member te hi ngaihhnathiam theih tho an ni a. Amendment thar ang hi chuan Korean ministry lamin an recommend phawt chuan kum 30 an nih thlengin sipaia tan loh theih dan emaw sawnhlat theih an ni thung.