World number two nilai an ni a, an hmaah an ram chanchin a vawi hnihna atan chauh a World Cup khel an ding. Heti chung hian hnehna chang zo lo teuh hle in Belgium in 1-0 in Canada an hneh hram.
Nilaini zana Ahmad bin Ali Stadium a inkhelah Canada an fakawm a. Inkhel hun tam zawk chhung chu kheltha zawk an ni.
Mahse goal hmaah an hlauhawm tawk lova. First half-ah penalty hmanga hma hruai thei an nihlaiin an thiampuipa Alphonso Davies pet chu Belgium goal veng Thibaut Courtois chuan a save sak.
Real Madrid goalkeeper hian Alistair Johnston lakah save tha tak a siam a ngai bawk a. Mahse halftime dawnah Canada in goal an khung theih loh chu Red Devils in an tawrh tir ta a. Toby Alderweireld ball vawrh luh chu Michy Batshuayi chuan la in chiang takin Milan Borjan-a goal-ah a khung.
Second half-ah pawh Canada in goal nawr nat an tum fova, chance tha pawh an insiam thin.
Jonathan David tauh goal loh a uihawm a. An goal khungtu rinrawl Cyle Larin dahluh a nih hnuah ani pawhin huntha a nei.
Mahse a tawpah erawh football inelna sanga tawnhriat neitha tawh zawk leh player tha ngah zawk Belgium in an tih tur an ti thei a. Hnehna chang turin a tawp thleng an tang tluan.
Belgium coach Roberto Martinez pawhin an khingpuite a fak a, anni lamin hma an sawn a ngai tih a sawi tel.
‘Canada khelhdan thlir kha chuan keini aia team tha zawk khelmualah khan an ni. Mahse a chak zawk kan ni a, tunah chuan hma kan sawn a ngai hle. Hei aia tha zawka khel tur hi kan ni.”
“Tournament kal zelah hmasawnna chu a awm dawn a, bul kan tan chauh. Mahse hnehna chang chunga hmasawn theih hi thil tha tak a ni. Vawiinah kan thiamna hmangin kan chak lo. Mahse World Cup-ah chuan engti kawng pawh a chak theih a pawimawh.” a ti.