India-a police-te chuan dealer kut atanga cannabis an man sa, an station-a an dah zinga kg 200 dawn chu sazuin an ei chhia tih an sawi.
“Sazu hi rannung te tak te, police pawh hlau ve lo an ni a. An lak atanga ruihhlo venhim hi a harsa hle,” tiin Uttar Pradesh-a court chuan a sawi.
Court hian police hnenah hian ruihhlo an mansate a riral dan hi a finfiahna pea an dahna pho lang turin a ti.
Judge chuan sazu chiten marijuana an tihchhiat dan thubuai pathum chungchang a ngaihtuah.
Judge Sanjay Chaudhary chuan thuremna a tihchhuahah court-in police-te chu finfiahna atan an ruihhlo man sate phawrh turin a ti a, hetah hian cannabis kg 195 zet chu sazuin an ei chhia tih sawi lan a ni.
Thubuai dang, ruihhlo kg 386 zet man sa bothlau dan ngaihtuahnaah pawh police chuan cannabis an man sa thenkhat chu ‘sazuten an ei’ tiin an sawi bawk.
Judge Chaudhary chuan police-in marijuana an man sa kg 700 chuang zet chu Mathura district-a police station-ah dah a nih thu leh ‘sazuten an ei chhiat mai a hlauhawm hle’ tiin thuremnaah hian a tar lang.
Police hian sazute hi an tet em avangin tih vak ngaihna pawh a awm lo niin judge chuan a sawi a. ‘Hlauh nei ve lo sazute’ laka bungraw man sate himna tura tha ber chu ruihhlote chu lab-a thil zir chianna hmun leh damdawi siamte hnenah sorkar rawn chunga leitir mai a nih thu a sawi bawk.
Hetih lai hian Mathura district-a police hotu pakhat, MP Singh chuan a thuhnuaia awm chhunga police station-a marijuana an kawlte chu ‘ruah sur nasain a tichhia’ niin a sawi ve bawk.