Aizawl: Chief Minister Zoramthanga chuan nimin zing khan MLA fund atangin Sihphir Venghlun, Sihphir leh Nausel atanga Covid-19 leng avanga eizawnna kawnga harsatna tawk leh hmeithai thenkhat thlanchhuahte hnenah puanthui khawl leh tuizem (1,000 litres) a sem.
Sihphir Venghluna semna inkhawm neihah thu sawiin chief minister hian hripui leng avangin hun rei tak nunphung pangngai awm thei lo leh eizawnna pawh kalpui thei mang lo mi tam tak an awm avanga economy-in a tawrh phah thu a sawi a. India ramah pawh chhiah tlingkhawm a tlem phah nia sawiin, state tin ten chhiah tlingkhawm atanga an chanpual an hmuh ngei ngei tur pawh an hmuh theih tak loh thu a sawi.
Chief minister hian nimin vek khan Nausel, Sihphir Venghlun leh Sihphir a hmalakna hna thawh thenkhat leh hmalakna tur an thlente chu a enpui a. Khawtlang hruaitute leh mipuite nen an inkawm bawk.