Dawrpui Sikul-in nimin khan an sikul complex-ah an kum 100 tlin an lawm a. Dawrpui Sikul Centeanry lawmna hi bialtu MLA, Minister of State Robert Romawia Royte leh School Education Director Dr H. Lalthlangliana’n an telpui.
Centeanry lawmna hun khatnaah bialtu MLA chuan centenary lungphun hawngin Dawrpui Sikul chu zirna in hlu leh pawimawh a nih bakah pawl hrang hrangten inkhawmpui nan leh hnam pum huap rorelna pawimawh neihna atan pawha hman thin a nih thu a sawi a. “Dawrpui veng tan mai ni lo, rampum huap tana hmun hlu a ni,” a ti.
ICT minister ni bawk, Robert Romawia Royte chuan Dawrpui Sikul-a primary section, middle section leh higher secondary te chu computer set khat theuh pein, Dawrpui School-ah NIELIT IT Centre din tum a nih thu a sawi. Dawrpui Sikul zirtirtute leh zirlaite chu theihtawp chhuaha tang sauh sauh tura fuihin centenary chibai bukin duhsakna a hlan bawk.
School Education Director Dr H. Lalthlangliana pawhin Dawrpui Sikul Centenary Souvenir a tlangzarh a. Dawrpuiin sorkar sikul duh lova deficit system an thlang zawk chu tifuh a tih thu sawiin, mipuiin zirna atan mawhphurhna an lak chu tul a tih thu a sawi a. Hun vawn dik a pawimawh thu leh tunlaiah traffic dinhmun ngaihtuah chunga hun vawngdik tura insiamrem thiam te zir zel a pawimawh thu a sawi bawk a ni.
Dawrpui Sikul hi kum 1922-ah primary atanga tan niin, kum 1947-ah middle section hawn tan leh a ni a, kum 2004-ah higher secondary (Dawrpui School of Science & Technology) hawn a ni ve leh bawk.
Primary section-ah zirtirtu pariat leh zirlai 53 awmin; middle section-ah zirtirtu 10 leh zirlai 74 an awm mek a. Higher secondary-ah lecturer 12, non teaching staff pathum leh zirlai 263 an awm mek bawk.
Dawrpui Sikul Centeanry lawm hun khatna chu Managing Board Chairman Dr C Zarzoliana’n a kaihhruai a, Dawpui Sikul zaipawl leh Dawrpui Branch YMA Zaipawl te an zai a. Chawhnu lamah hun zangkhai hmangin zirtirtu zinga mi, B Malsawmtluangi (Spi); zirlaite leh veng chhung zaithiamte bakah veng pawn lam atangin Jerry Lalrinawma, Cindy Lalthanpuii leh Sangtei Khuptong te an zai a, tlaiah khawtlang huapin centenary lawmna ruai an theh bawk a ni.