Aizawl district Superintendent of Police C Lalruaia’n sorkar khap halpuah leh a kaihhnawih zuar leh hal luite chu police hnena report zel turin mipui a sawm a. Zonuam Veng hmeichhe naupang pawngsual nia ngaih chungchangah a nu leh pate lie ditector hmanga thu zawt fiah turin Delhi atangin mi thiam chah chhuah an ni dawn tih a sawi bawk.
C Lalruaia chuan nimin khan a pisaah chanchinbumite a kawm a, sorkarin Krismas leh kum thar vuakvetah halpuah leh a kaihhnawihte zawrh leh hman a khap a, thupek bawhchhiate chu an man zel dawn a, tun kar Thawhlehni khan Bawngkawnah halpuah leh halmawi chi hrang hrang Rs 65,000 man hu an man tawh thu a sawi.
Aizawl district mipuite chu heng sorkar khap thil zuar lui leh tilui an hriatte chu police hnenah hrilh hre turin an sawm thu a sawi a, “Kum danga khapna kan kalpui tawhah dan bawhchhia an awm chungchang report hi kan dawng ngai lo a, thenkhat hi chu in chung sang atanga hal luite an ni a, halpuah leh halmawi halna bul hnaia awmte hian min rawn hrilh hre thei se kan duh a, Aizawl chhunga police station hrang hrangah report mai tur a ni,” a ti.
SP chuan nikum khan hunpui laiin halpuah leh halmawi kaihhnawihah thubuai 23 an ziak lut a, puak thei thil kawl mi 16 leh a hmangtu mi pasarih man an nih thu sawiin, thubuai 23 zinga 18 chungchang chu court-in a rel fel tawh a, convict vek an ni a, thubuai panga chu la ngaihtuah mek a nih thu a sawi a. Kuminah chuan nikum anga thubuai ziah luh chu tam tawh lo se an duh a, khapna thupek chu mipuiin zawm tlang thei se an duh tih a sawi bawk.
Chanchinbumite zawhna chhangin C Lalruaia chuan Aizawl Zonuam venga hmeichhe naupang kum hnih leh thla nga mi chungah pawngsualna a thleng ngei nia rinhlelh chungchangah naute nu leh pate chu lie detector hmangin thu zawh fiah an ni dawn tih sawiin, Mizoramin lie ditector hi a neih loh avangin Delhi-a Central Forensic Science Laboratory-a mi thiamte chuan an khawl kengin December-ah Mizoramah an kal dawn a, an kalna tur thlawhna ticket pawh ruahman fel a ni tawh thu a sawi.
C Lalruaia chuan pawikhawihtua puhte pahnih chu hun eng emaw chen police-ten thu zawtfiaha an kawl hnuah judicial custody-ah pawh lak an ni tawh a, tunah hian bail hmanga chhuah lailawk an ni a, lie ditector hmanga endik dawn hnaiah koh leh an ni dawn tih a sawi bawk a ni.