Vawi li world champion ni tawh, khawvela football ram ropui zing ami Germany in an khingpuite an zuam sual a. Second half-ah mualphovin Japan in 2-1 in an hneh.
Inkhel hun tam zawk chhung an thunun a, team tha zawk an ni tih a lang. Mahse a hmawr an bawk thei lova, an tih tur an tih theih loh avangin tlawmin bul an tan.
Substitute Takuma Asano chuan Japan chakna goal a khung a. Amah tiheltu Antonio Rudiger leh Germany defender te an hawihai.
Hnuh hniamin an awm
Khalifa International Stadium a inkhelte squad enin a tha zawk an chiang. Germany in khawvel football a player tha rual an khelhtir. Hetihlai hian centre-forward pangngai hi ‘world class’ han tih tur an neih loh chu an inkhelh chhungin a hriat.
Goal khungna remchang an insiam nual a, Japan goalkeeper Shuichi Gonda chuan save ropui tak tak Serge Gnabry leh Jonas Hofmann te lakah a siam.
Inkhel hmuhnawmah Japan an thawkrim a, lehlamah Manuel Neuer awl tir bik lovin Junya Ito goal khung tur a dang tha.
Minute 33-naah Germany in goal an khung a, Ilkay Gundogan chuan penalty atangin a hlah lo.
Minute 75-naah Japan substitute Ritsu Doan chuan an si phurh sutna goal a khung a. Minute riat a liam lehin chakna goal a lut zui.
Kum 2018 a group stage a a mawngphah a awm tawh Germany in 1-0 a nihlaia an huntha hloh hnem an tuar a. Spain leh Costa Rica hmabak an la nei a. Chesual thei viau an la ni.
“Japan hian team tha tak an nei a, awmze nei a remkhawm an ni in an player-te leh coach a fing a, ball khawih an thiam bawk. An chakna an hmang thiam a, keini aiin tihsual an nei tlem.” tiin an khingpuiten chak an phu a, chhuanlam an nei lo tih a sawi.
Spain an ‘training’
Doha a Al Thumama Stadium-ah Nilaini zan khan tun World Cup a inkhel la inthlau ber tia chhal ngam an khel a. Spain in team chhia ni lo Costa Rica lakah an thiamzia lantirin 7-0 in an sawp.
La Roja tan muallai luahtu rawlthar midfielder pahnih an hmuhnawm a. A bikin kum 18 leh ni 110 a upa Gavi-a’n khawvel hriatah player tha bik a nihna a pholang a, record a siam. Kum 19 mi Pedri nen inkawpin kum 1962 hnua European team tana World Cup a midfield a kum 20 tling lo rawlthar inkawp leh hmasa ber an ni.
Barcelona rawlthar hian minute 74-naah goal a khung a. Spain tana World Cup khel thei naupang ber a nih zanah World Cup a goal khung thei naupang ber pathumna a ni bawk.
Dani Olmo hmangin minute 11-naah goal mawi an khung nghal a. Minute 21-naah Marco Asensio chuan a chhunzawm.
Ferran Torres-a’n minute 31-naah penalty atang an goal thumna khungin second half-ah an goal li na a khung lehnghal a. Gavi-a’n goal a khung hnuah huntawp dawnah Paris St-Germain midfielder Carlos Soler leh striker Alvaro Morata ten goal an khung hman.
“Player danglam bik a ni a, tunah kum 18 chauh nimahsela tawnhriat nei teuh tawh ang mizia a nei. Khawvel football star ropui zing ami a la ni dawn.” tiin coach Luis Enrique chuan Gavi a fak.