UFC light heavyweight champion Jiri Prochazka chuan a darah hliam a neih avangin December 10-ah a inlan dawn lova. A hliam hi a nat avangin a chawlh a ngai rei dawn a, a champion kawnghren chu a chhuahsan tih UFC president Dana White chuan a sawi.
Kum 30 mi Prochazka UFC 282-ah a title lakna Glover Teixeira nen rematch nei tur an ni a. Mahse a training-ah a inhliam avangin a inlan thei dawn lo tih Nilaini zan khan a sawi chiang.
A dar hliam hi zai tur niin thla 6 vel tal enkawl ngai a ni dawn a, hei vang hian kum khat vel inlan thei lo tura ngaih a ni a. 205 pound division tihkhawtlai a duh loh avangin a champion kawnghren kalsan a thlang ta zawk.
A manager Tim Simpson chuan, “Jiri hian title kalsan hi a thlang a. Fighter dangte zahna a lantir avangin midang lo dal a duh lo.” tiin a sawi.
UFC 282-ah hian Teixeira hi Magomed Ankalaev (18-1) nen intum tura biak an ni a, mahse kum 43 mi ni tawh Teixeira chuan khingpui dang atana inbuatsaih nan a hun a tepter tawh lutuk avangin a phat thu a sawi ve bawk a. Champion hlui Jan Blachowicz (29-9) leh Ankalaev ten title ruak hi an inchuh ang.