Aizawl: ZPM Leader Lalduhoma chuan MNF sorkar hotute leh smuggler-te chu inngheng tlat nia a lan thu a sawi.
Nimina Kawrthah Hmarveng YMA Hall-a ZPM Hachhek North Block Conference hmanpuiin ZPM leader hian thu a sawi a. Kuhva hian ‘bana kaih policy’-ah hmun pawimawh tak a chang dawn tih sawiin, “Tunah chuan kan sorkar hotute leh smuggler-te hi an inngheng tlat niin a lang a, opposition party kan ni a, tih theih kan nei tam lo,” a ti.
ZPM an sorkar chuan kuhva hi hna hmasaak an nei dawn tih sawiin Lalduhoma hian, “A tám tur laka invenna pawh kan ngaihtuah ang. Kuhva sawngbawl dan zira training turin kan intir dawn a, a hlutna tipung turin tihdan kan zawng ang. Kuhva chingtute leh company-te direct-a kan indawr dan tur kan ngaihtuah ang a, kawng zawm zawng zawng kan dap ang,” tia sawiin, a man leh market hre sain inthlan dawnah puang thei turin an inpuahchah dawn niin a sawi.
Lalduhoma hian Zawlnuama Central State Farm ni thin, horticulture department kuta awm hectare 125-a zau, hectare 25-a zau fishery department enkawl mek chu hman tangkai dan an ngaihtuah dawn nia sawiin, “ZPM a sorkar chuan industrial estate atan hman kan tum dawn a. Kuhva, mau, hmunphiah leh sawhthing sawngbawlna hmunpui dah kan tum dawn a; cold storage, ware house leh godown pawh kan dah a ngai ang. Langkaih leh Teirei-ah mau a tawlh theih a, a tangkai dawn a ni,” a ti.
ZPM Working President K Sapdanga pawhin thu sawiin kawng tinrenga hmasawnna hnathawh nan kawlphetha a pawimawh tih a sawi a. Mizoramin a siam theih reng chu man to taka lei thin a ni chu a manganthlak tih a sawi a. Mizoram hi thlai tinreng ngeih niin a bikin kuhva hi a thawh hlawk ber, Hachhek tlangdung pawh a thawhhlawk ber an ni a, kum 2023 inthlanah ZPM-in thuneihna a chang a nih chuan kuhva chingtute harsatna tawh mek hi an sutkian tur thu a sawi.
Inkhawm hi ZPM Hachhek North Block President RS Vanlalpeka’n a kaihruai a ni.