Mumbai khawpui leh a chhehvela sentut leng mek avangin naupang 12 zet an thi tawh tih thuneituten an sawi.
Sentut avanga naupang thi hmasa ber hi October 26-27 vel khan niin darkar 48 chhungin naupang pathum an thi hman a ni.
Nilaini thleng khan Mumbai khawpuiah hian sentut vei hi mi 233 an awm tawh a, nikum chhung zawng khan 92 niin mi pahnihin an thihpui a, a let thum dawnin a vei hi an tam tawh zawk a ni.
Thuneitute chuan Covid-19 a len laia invenna damdawi pek khaihlak avang khan tunah hian a leng leh vei an tam phah ta niin an sawi.
Thi tharlam ber hi Thawhlehnia mi kha niin naute thla riat mi a ni tih tual chhung rorel khawlin thuchhuah an siamah an tar lang.
Sentut hi thihpui awlsam tak niin Covid aiin thihpui a awl zawk a, puitling pawhin an vei theih natna ni mah se naupang kum nga hnuai lamin an vei nasa zual.
He hri hi khuh, taksa bawl leh khawsikin a thawk thin a; mump, measle & rubella (MMR) vaccine dose hnih lakin a ven theih.
India ram chauh ni lo, Europe khawmualpuiah pawh MMR vaccine pek a tlem avangin a leng chiam thin.
Invenna la lo 10 zela pakua chuan an vei thei anga chhut a ni a, natna pawh lang chhuak na tak an nei thei nia ngaih a ni.
Taksa bawl bakah hian sentut hian natna dang pawh a thlen thei a. Khawsikpui leh thluak lam khawih natna thleng pawhin a thlen thei a, thenkhatah phei chuan thihpui theih a ni.
Invenna lak hian heng thil thleng thei hrang hrang hi a veng vek thei thung.
MMR vaccine dose hnih lak hian sentut lakah 99% a veng thei a, biangboh pawh 88% chuang a veng thei bawk.
Invenna la an tam hian heng natna thlen theihna hi a tlem sawt thin a, mi dang kai theihna pawh a tlem sawt thin bawk.
Hetih mek lai hian Covid a len tan atang khan naupang hnena vaccine pek chu a khaihlak nasa em em a, a late zingah ngei pawh a huna la thei lo an tam phah hle.
Kum 2020 chhung ringawt khan khawvel pumah naupang maktaduai 23 zet chuan naupan laia invenna lak ngai ang an lak theih loh phah a. Kum 2009 hnu lama naupang invenna la lo an tam ber tum niin kum 2019 kha chuan naupang maktaduai 3.7 chauhvin invenna lak ngai an la lo niin Unicef chuan a chhinchhiah a ni.
Mumbai-a thuneitute chuan Covid leng avang khan naupang 20,000 vel zetin sentut laka invenna damdawi hi a hunah an lak loh phah niin an sawi.
“Heng naupangte hi an awmna kan chhui zui a, vaccination camp siam chu kan ngaih pawimawh em em a ni,” tiin Mumbai-a executive health officer Dr Mangala Gomare chuan The Indian Express chanchinbu hnenah a sawi.
Damdawi lam thuneitute chuan invenna lak hlauhna avangin a pek hi a khaihlakin la lo an awm phah thin tih a sawi bawk.
“Invenna lak zawhah hian naupang thenkhat chuan khawsik na vak lo neiin chiuna lai bawr a na deuh thin bawk a, nu leh paten invenna an lakpui duh loh phah thin,” tiin Shreya Salvi, health volunteer chuan chanchinbu hnenah hian a sawi bawk.