Congress President Lalsawta chuan ram siam thatna kawnga thurawn engpawh dawngsawng turin an party chu a inpeih reng tih a sawi.
Nimina MPCC political session-ah thu sawiin Lalsawta hian mi thiamte atanga ram inrelbawlna tur kawng inkawhhmuh chu thil hlawk leh tul tak a ni tih a sawi a. Mi thiamten ram tana an thiamna leh theihna tangkai taka an hmang thin chu lawmawm tiin, Congress party-in sorkarna siam tuma hma a lak danah mi thiamte thurawn a tangkaizia leh tum thuhmun neih chuan nasa takin kawngro a su dawn nia sawiin, “Ram siam thatna kawnga thurawn engpawh dawngsawng turin a inpeih reng a, lawm takin kan dawngsawng zel ang,” a ti.
Political session hi Dr Henry Zodinliana Pachuau, President, AIPC-in kaihruaiin, Prof. Lalhriatpuii, Head, Department of Economics, Mizoram University chuan ‘Mizoram thingtlang retheihna: Kan dinhmun leh hmalak dan tur. Multi-Dimensional Poverty Index atanga thlirna’ tih hmangin powerpoint presentation a pe.