- PC Thang Zikpuia
Vawiin chu lehkhabu aka zuar kual thin, ka lehkhabu pawh eng emaw zât min hralhsak tawhtu, pa fel tak hian office-ah mi rawn tlawh a. Mizo Grammar Society (MGS) lehkhabu tih chhuah ‘Mizo tawng Ziah Dan Dik’ tih kha zawrh tur a rawn lam leh a, lehkhabu dawra kan dah bâk bu ruk chauh kan neih tawh thu ka lo hrilh a. Ani chuan, “In lehkhabu hi Prof. Darchhawna ka va zawrh ve a, ani chuan, ‘A bu hminga ‘ziak dan’ ti lova ‘ziah dan’ an tih atang hian ka chhiar lo ang. Lo hrilh rawh, zawngtah hi ziah chi a ni a, thu hi chu ziah chi a ni lo a, kan ziak thin,’ a lo ti a,” tiin min hrilh a (hei hi phuah chawp thu mai ni lo turah ka ngâi a).
MLC-in ‘Mizo Tawng Ziah Dan’ tih bû an han tih chhuah pawh khân MLC-a Mizo tawng ziah dan buaipuitu zinga pakhat pawhin a office-a kan titi dunnaah, Mizo tawng chungchânga mi hming langsar tak pakhatin (a hming sawi lang lo mai ila) MLC lehkhabu chungchâng a sawi dan min hrilh a. “Ka dawhkana he lehkhabu lo let reng hi a rawn hmu a, ‘Kei chuan ka chhiar lo ang, ‘ziak dan’ ti lova ‘ziah dan’ in tih atang hian!’ a rawn ti nghal tawl mai a!” a ti.
Tun hmâ deuh pawh khân Mizo tawng lama mi hming langsar deuh zingah pawh ‘ziak’ hi ‘ziah’ tia modify hi dik lo anga ngai tlat an lo awm tawh thin niin a lang a, J.F.Laldailova-te pawh khan hemi chungchângah hian thu an lo inchuh ve viau tawh thin a; ani J.F.Laldailova kha ‘ziah’ tia modify dik titute lamah khân a tang na ve hle thin a ni àwm e. Vawiin thleng hian hemi chungchânga ngaih dan inan lohna hian kan zingah hnuhmâ a la hnutchhiah ta zel a. Mizo subject-a degree hum chin leh mi thiam pui pui nia kan ngaihte zingah pawh ‘ziak’ hi ‘ziah’ tia modify a dik lo titu an la awm zel a; chuvangin, ‘ziak’ hi ‘ziah’ tia modify chi a ni em tih hi Mizo tawng grammar kàl phung atangin kan bih ve leh lawk dâwn a ni.
A hmasain transitive verb ziarâng hi kan hriat chian a ngâi hmasa a. ‘Transitive verb chu tuartu/dawngtu (object) mamawh thil tih sawina a ni’ tih hi chu kan hre viau a, a object nen kan sawi kawp thin tih pawh kan hria a. Chutih rual chuan transitive verb ziarâng pakhatah chuan a root word hian object pakhat chauh a neih lâiin, a modified form hi chuan object pahnih a nei thin tih hi kan hriat tel a ngâi a. Kan sawi mêk ‘ziak’ tih pawh hi transitive verb a ni a, a root word hian object pakhat a neih lâiin, a modified form ‘ziah’ erawh hi chuan object pahnih a nei thin tih hi kan hmuh fiah a ngâi ta a. Entirna han târ lang ila:
Lala’n milem a ziak.
Lala’n milem min ziah.
Entirna kan tàr lanah hian a hmasa zâwka ‘ziak’ kan hmannaah hi chuan object pakhat chauh kan hmu a, chu chu ‘milem’ hi a ni. Pahnihnaa ‘ziah’ kan hmannaah erawh hi chuan object pahnih kan hmu thung a, chu chu ‘milem’ (noun) tih leh ‘min’ (pronoun) tih hi a ni ta a. Heta object pahnih awmna setence-ah hian a root word hi hmang ta ila, “Lala’n milem min ziak,” tiin tawngkam kan chelek dâwn tihna a ni ta a, a ulh mai bâkah tawngkam dik pawh niin a lang dâwn lo a; chuvangin, hetianga object pahnih awmna tawngkam kan cheleknaah hi chuan ‘ziak’ hi ‘ziah’ tia modify ngei chi hi niin a lang ta a ni.
Chu lo lehah chuan zawhna tawngkam (interrogative particle) ‘eng, em, maw’ tih ang chi hi kan tawngkamah verb hmâa kan phusaktir chuan, verb kha modifoed form nei a nih chuan a modified form kan hmang thin a. Entirna han târ lang leh ila:
Eng thu nge i lo ziaht
Ram lem em ni i ziaht
Hei hi maw i lo ziaht
Hetianga kan sawina tawngkamah hian ‘ziak’ hi ‘ziah’ tia kan modify loha, a root word ‘ziak’ hi kan hmang ngar ngar dâwn a nih chuan, “Eng thu nge i lo ziakt” tiin leh, “Ram lem em ni i ziakt” ti tein, “Kha kha maw i lo ziakt” ti tea tawngkam kan chelek a ngai dâwn tihna a ni a, Mizo tawng pawh a ang lo thei lek lek hial mai dâwn a ni.
Mizo tawnga thu hnung bet (suffix) kan neihte hi verb thu mala an beh chuan, an behna verb thu mal kha modified form nei chi a nih chuan a modified form-ah a inlet thin a. ‘Ziak’ tihah pawh hian suffix ‘tir, na, pui, sak…adt.’ tihte hi kan behtir chuan ‘ziahtir, ziahna, ziahpui, ziahsak…adt.’ ti tein kan sawi a, a modified form ‘ziah’-ah hian suffix-te hi kan behtir thin a ni. Hengah pawh hian ‘ziak’ hi modify lova a root word ‘ziak’ chauh hi kan hmang dâwn a nih chuan:
Bawng lem min ziaktir an tum.
Thu ziakna tur han la teh.
Thil lem ka ziakpui mai mai.
Milem min lo ziaksak teh…adt.
Hetiang hi kan tawngkam chelek dan tur chu a ni leh ta a, a eng emaw ti phiar sek tung mai dâwn a ni. Chuvangin, hetianga suffix a behnaah hian ‘ziak’ hi verb dangte ang bawka kan modify ve a ngâi niin a lang a, a modified form ‘ziah’ kan hmana ‘ziahtir, ziahna, ziahpui, ziahsak…adt.’ tia kan sawi hian a dik êm êm zâwk niin a lang.
Mi thiam pui pui nia kan ngaihte pawhina ‘ziak’ hi ‘ziah’ tia modify an duh lohna chhan nia lang leh, tanchhan atâna an sawi lan ber thin chu, ‘zawngtah chu ziah chi a ni a, thu chu ziah ve chi a ni lo’ tih hi a ni a. Pu JF-a dan takah, hnung thak leh tui khur pawh kan hiat ve ve a, kan hiah dan a inang lo mai chauh a ni zawk a; chu bâkah ‘ziat’ modify form atâna ‘ziah’ kan hman avangin ‘ziak’ modify form atâna ‘ziah’ lo hman ve hi rem tih loh bur tur pawh a ni lo a, intransitive verb thu mal ve tho ‘chep’ tih leh ‘chêk’ tih pawh hian modified form an intawm a, ‘cheh’ tia modify ve ve an ni ve tho tih te hi kan hriat tel a tha àwm e.
Kan han sawi chin atang hian ‘ziak’ tih hi ‘ziah’ tia modify hi a lo dik reng em tih chu chhiartute’n Mizo tawng grammar kàl phung atangin in lo bih zui ve tawh mai ang a; tichuan, Pu Darchhawna’n, “Lo hrilh rawh,” ti meuha thu a rawn chah kha, a thu kengtu khân a chah ang ngeiin mi a rawn hrilh ta bawk si a; chuvangin, heti hian dik nia ka hriat dan ka rawn sawi ve ta nghal mai a; amah Pu Darchhawna mi chhàn lêtna pawh beisei hlawhtling ve teh hlauh ila ka lawm ngawt ang le.