Aizawl: Mizoram Pig Farmer Association (MIPFA) chuan sorkarin agency kaltlanga state dang atanga vawksa la lut tura a hmalakna chu tihtawpsak turin chief minister an ngen.
MIPFA hruaitute chuan nimin khan ngenna lehkha chu Chief Minister Office-ah an thehlut a, an lehkhaah chuan sorkarin agency kaltlangin state pawn atangin vawksa la lut turin ruahmanna an siam tih sawiin, he hmalakna hi vawk vulhtute tichhe thei tur a nih thu leh African Swine Fever (ASF) hripui a la reh loh avang leh tual chhung vawksa man thlenga nghawng thei a nih avangin Agency kaltlanga vawk lak luh tum mek chu tihtawpsak turin an ngen tih an tar lang a ni.
An tar lan zel danin, Aizawl Vawksa Zuar Association-ten state pawn atanga vawk lakluh sorkara an dil chungchang ngaihtuahin MIPFA, Aizawl Vawksa Zuar Association leh Vety department hotute chu an thukhawm a, hetah hian MIPFA leh Vety hotute lamin kumina vawk pul hri leng nawn leh ang a thlen tawh loh nan state pawn atanga vawksa leh vawk lak luh chu la hun loah an ngaih tih an lo sawi chhuak tawh tih an tar lang.
Sorkar hotute uapnaa thutkhawmah state pawna vawk lak luh a him loa ngaih a nih thu sawi a nih laia vawksa zuarte ngenna anga state pawn atanga vawk lak luh tumna awm leh ta chu pawi an tiin, an rilru a na tak zet tih an lehkha theh luhah chuan an tar lang a ni.