Italian Formula One team Ferrari chuan hun engemaw chen atanga thu a than hnuah an team principal Mattia Binotto chu an chhuahtir dawn niin sawi a tam zual hle.
Tun season-ah Ferrari in car tha tak neiin season bul tha takin an tan a. Mahse season a kal chho zel tihin team anga tihsual an ngah a, car tihchak lama inelnaah pawh an elpuite an tluk lo.
Hei vang hian Ferrari chairman John Elkann chuan an racing team siksawi a duh niin a lang a. Alfa Romeo chief Frederic Vasseur chu a thlaktu a ni dawn nia sawi a tam.
Kum 53 mi Binotto hi engineer niin kum 1995 khan Scuderia Ferrari hi a zawm a. Engine department lamah bul tanin Ferrari tan mi tangkai a ni. Kum 2019 atangin team principal ah an dah.
Kumin a car tha an neih theih chhan lian tak ni a sawi nimahsela intlansiak lamah team in a kaihhruaina hnuaiah chetsual an ngah lutuk avangin a hmalam hun a chiang lo niin a lang.