Thenawm Myanmar ram atangin kuhva ro phurhluh a tam hle mai a, heng hmanga sumdawngte hi an hausa hlawm hle bawk. Tin, an sumdawnna hi a lian hle mai a, pawisa insen lah an hreh lo hlawm hle a, ramri dep khuate nun nasa takin a nghawng a, rah duhawm lo zawk a thlen palh ang tih an hlau hlawm hle.
Hemi chungchang hi assembly rorelah pawh sawichhuah niin, Taxation Minister Lalchamliana chuan Myanmar atanga Mizoram kaltlanga kuhva lak luhten Silchar lam a thlen thlak lohna turin sorkar a inbuatsaih mek tih house a hrilh a, kuhva chu smuggling goods ni lo mahse ram dang atanga lak luh a nih chuan illegal goods a lo ni ta tih a sawi a, “Champhai lamah kuhva an ching tih kan hre si lo a, chuvang chuan a rinhlelh awm em em a; chuvangin, Assam lama lut thla thei lo tura dang turin kan inbuatsaih ta a ni,” a ti.
Zokhawthar kal tlang kher lo pawhin he sumdawnna hi kalpui a ni nasa hle a, mahni a JCB hire a kawng sial chawp an tam em em bawk. Heng kuhva phurte hian kawng an tihchep bakah traffic jam a siam nasa hle mai a, Champhai kawng paltlang apiangin an nin thu an sawi hlawm. Khan hrang hrang a tam avangin heng an paltlang khuate thalai nun thlengin a nghawng a, an zirna lam ngaihsak lo khawpa bansan zui tate pawh an awm!
Sawi tawh angin assembly house-a sawichhuah tawh a ni a, sorkar hian ngaihtuahna thar senga kuhva lakluh khuahkhirhna lam hi a kengkawh tak tak lo a nih chuan thalaite nun nasa takin a nghawng ang a, thisen a la luang lovang tih lah a sawi theih hek loh. Tunah hian khan 30 chuang fe a awm tawh niin sawi a ni a, sum chevel lah a sang nasa mai si a, kuhva phurh luh kawngah hian sorkar hian khuahkhirhna thapui chhuah mawlh teh se.