Aizawl: ZPM Leader Lalduhoma chuan leilung behchhan eizawnnaten ZPM policy-ah hmun pawimawh tak a luah tih a sawi.
Ningani zana ZPM Mamit Central Block huaihawtin VC Hall, Mamit Bazar vengah vantlang inkhawm neih niin Lalduhoma’n hmanpuiin thu a sawi a. Mamit district chhunga Langkaih, Teirei leh Tut luipui phaiten eibar tling khawp leilung hausakna an neihte an an thlithlai uluk hle tih sawiin, “Heng luipui ngheng khuate nen hian multi-purpose project duang turin remchang kan dap dawn a, eng berah nge chung project-te chu kan kaltir ang tih lo inhmakhawsuih turin kan hruaitute pawh kan inrawn zel a ni,” a ti.
Lalduhoma hian, “Zirchianna nen kum hnih chhung kan buatsaih hnuah policy kan peih tawh a; he district sik leh sa mil zawng tak thlai awmsa te, kan thiam sa leilung behchhan eizawnnaten ZPM policy-ah hmun pawimawh tak an luah a ni,” a ti bawk.
ZPM Working President K Sapdanga pawhin thu sawiin Vangpui Fehchhuah buatsaihin Zoram dung leh vang an fang mek a, report atanga a lan dan leh an party-in hma an sawn dan ngaihtuahin an lawm hle tih a sawi a. “Tunah hian assembly house-ah opposition party lian ber kan lo ni ta a, party dangte hian phuahchawp nen nasa takin min bei a, a thente phei hi chu Mizo leh Mizo inbeih nan chuan a uchuak mah mah em aw tih tur hial a ni,” tiin, heng an beihnate erawh mipuiten an awih hauh lo a ni tih mipui sukthlek atangin a hriat theih niin a sawi.
K Sapdanga hian hmun hrang hrang an tlawh kualnaah kalphung thar sorkar din turin mipuite an insingsa mup mup nia a hriat thu a sawi a. Tun hnaiah Bru zingah pawh he harhna hi a thleng mek tih sawiin, “Thil lawmawm tak mai chu heng kan Bru unaute hi kaphung thar hmang hmasatute zingah an tel nghal a ni. Candidate sum ei raltu nih tum loin an theihtawpin kuhva hmun samin an inhlawh thin a ni,” a ti.