Los Angeles Lakers guard Patrick Beverley chu tunkara Phoenix Suns nen an inkhelh tuma center Deandre Ayton a nam thluk luih avangin match thum khel lo turin an hrem.
NBA chuan Beverley hian Ayton chu a inrin lohlaiin a nam lui a, hei vang hian hrem a nih thu an sawi.
NBA executive vice president leh head of basketball operations Joe Dumars chuan he hremna hi Beverley-a’n tunhma a court chhunga chetdan hnuhma a lo neih tawhte thlir tel a nih avanga kengkawh an nih thu a sawi ve bawk.
Hrem a nih chhung hian a hlawh pek a ni dawn lova, match thum chhung a khelh loh avangin Dollar 268,965 a chan tura ngaih a ni.
Beverley hian San Antonio Spurs vawi hnih an hmachhawn tur leh Indiana Pacers an khelh hunahte court chhung a lut ve thei dawn lo.
Suns leh Lakers inkhelh tumah hian boruak a sang a, Lakers swingman Austin Reaves chu Suns guard Devin Booker chuan ti tlu luiin flagrant foul pek a ni ve bawk a. Hemi boruak inzui zelah hian Beverley te an buai ve ta a ni.
“Khatiang lo deuh khan boruak sanlai pawha awm thei kha ka ni. Keima tihsual a ni. Mi puitling ka ni a, hremna pawh ka pawm thlap ang.” Beverley chuan a ti.