Brazil in hnehna nen Ningani zanah World Cup bul an tan a, mahse an lawm a kim vek lo. Inkhel tawp lamah Neymar chu a kheimit lamah hliam a neih avangin lakchhuah a ni a, substitute bench lamah ngui taka a thu hmel hmuh tur a awm a. A hliam nat zawngah zawhna a tam nghal.
Brazil team doctor chuan inkhel zawhah an forward chuan hliam a nei a. Zirtawpni khan uluk zawka ennawn a nih tur thu a sawi.
Hetihlai hian hmun hrang hrang atangin Neymar chanchin inhriatsiak a ni tan a. A hliam avang hian Thawhtanni ah Switzerland a hmachhawn thei dawn lova, a World Cup erawh a la tawp dawn lo niin an sawi.
Kum 30 mi minute 80-naah Nikola Milenkovic nen ball an inchuhnaah a in ti na a. Inkhel zawhah a kheimit dinglam a vung nasa hle.
Brazil head coach Tite chuan, “Neymar hian World Cup hi a khel chhunzawm ngei ang tih hi kan ring. A inhliam tih pawh ka lo hre lo zawk a, mahse inkhel zawh lama a hliam ka han hmu kha ka rin loh lam tak a ni zawk.” tiin a sawi.
Brazil team doctor Rodrigo Lasmar chuan, “Tunah chuan kan nghah a ngai a, engkim chiang taka kan endik vek hma lo chu engmah kan lo sawi lawk dawn lo.” tiin an player an endik hma chu thuchiang a awm lo tih a sawifiah.