Assam-Meghalaya ramri, tun hnaia tharum thawhna thlenga mi paruk an thihna chhehvelah chuan venhimna khauh taka la kalpui niin khapna thupek pawh la hman reng a ni a. State pahnih inkar inkalpawhna pawh a ni ruk nan, Pathianni thleng khan khuahkhirhna hnuaia la tih a ni tih thuneitute chuan an sawi.
Assam Police chuan mipuite chu an thenawm state-ah hian Thawhlehni kal taa thil thleng avangin zin rih lo turin an ngen.
“Meghalaya-ah hian boruak a la muanawm famkim lo va. Assam mite leh an lirthei beihna la thleng thei a ni a; chuvangin, mipuite chu he state-ah hian zin rih lo tura ngen an ni,” tiin police officer-in a sawi.
“Zin ngei ngaite pawh Meghalaya-a inziak lut lirthei hmang turin kan inngen,” a ti bawk.
Police hian Assam atanga Meghalaya luhna pahnih, Guwahati-a Jorabat leh Cachar district-ah hungna an la dah reng.
Sumdawng lirthei, bungrua leh ni tin mamawh dang phur truck-te chu dan pangngaiin kaltir reng a ni tih officer chuan a sawi.
Buaina chhuahna chhehvelah hian punkhawm phal lohna, CrPC Section 144 hman a la ni.